KUCHING, SEPT 8: Siku indu orang tuai umur rugi sepenyampau RM149,550 sepengudah ditipu nengah kangau telefon ari orang ti enda dikelala.
Ku Tuai Polis Pelilih Padawan Supt Aidil Bolhassan madah, tudah nerima pesan pandak ari siti lumur ke enda dikelala ti madahka iya bisi meli barang ari shopee ti berega RM2,636.
“Tudah dipinta betelefon ngagai lumur Maybank lalu bejaku enggau lelaki ke benama John Ng. Ba telefon nya, John tu madahka penerang tudah diguna orang bukai ngerejister kad kredit Maybank Master Gold ba Kuala Lumpur lalu bedau dibayar sepenyampau RM 4,778.90.”
Sepengudah nya, tudah dipinta betelefon enggau Bank Negara Malaysia sereta diasuh meli insurans lalu iya mega besetuju.
Berindik ari nya, tudah bisi nerima mayuh lumur Transaction Authorization Code (TAC) lalu saspek ngasuh tudah meri lumur TAC nya ngagai sida.
“Tudah irau ati lalu nitihka semua pekara ke dipinta saspek nya,” ku Aidil madah ba siti penerang.
Sepengudah nyerahka lumur TAC, tudah sedarka bisi transaksyen duit keluar sepenyampau RM23, 850 enggau RM125,700 ari akaun Public Bank enggau Maybank ti diempu iya.
Enda lama udah nya, tudah ngaga ripot polis sepengengudah nemu diri ditipu lalu kes ditasat ba baruh Seksyen Kanun keseksaan iya nya nipu sereta ngujungka orang nya nyerahka reta sida.
Mensia mayuh dilalau ngambika meresa dulu lumur akaun ti diberi dikena nentuka sekalika orang ke ngempu akaun nya bisi rikod jenayah tauka enda.
