KUALA LUMPUR: Opis Wang Turu Pekereja (KWSP) enggau Grab Malaysia (Grab) udah nyain Sempekat Pemereti Ati (MoU) dikena meransang komuniti raban deriba enggau raban nganjung pemakai ngambika nyimpan wang turu pinchin nengah program i-Saraan ungkup raban ti berumur baruh ari 55 taun tauka nyimpan sechara volunteer ungkup sida ti berumur lebih ari 55 taun.
MoU tu sebagi ari Mou ke udah kala disain kedua-dua raban tu kena ka bulan lapan 2018 ke udah.
Ba siti penerang sehari tu, Tuai Pegawai Eksekutif Datuk Seri Amir Hamzah Azizan madahka, KWSP ngarapka komuniti deriba Grab enggau raban nganjung pemakai tu ngerejister diri nyadi raban KWSP lalu nyimpan wang turu pinchin sida sekalika nengah program i-saraan tauka nyimpan sechara volunteer.
“Kelimpah ari nya, program tu ulih mantu sedia nyediaka diri sepengudah pinchin, lalu sida mega deka bulih pemanah nyadi ahli KWSP iya nya nerima dividen tetiap taun sereta bantu ke bukai.
Berindik ari nya, Direktor Urusan Grab Malaysia, Sean Goh madahka Grab seruran deka meri peluang sebaka ngagai semua orang nengah chara muka peluang pekereja dikena ngurangka tikas orang nadai pengawa sereta meransang peranak di menua tu ngambika nambahka penatai pemisi nengah ekonomi digital tebal agi orang timpang pendiau.
Ku Sean madah agi, bisi penambah ba penyampau orang ngerejister diri nyadi deriba tauka raban nganjung pemakai Grab iya nya lebih 50,000 iku udah nyereta diri ba platform nya.
“Sida tu endang bebendar bekereja setiap hari dikena nambahka penatai pemisi diri empu. Lalu pekara tu meransang kami meri servis enggau naka pemanah,” ku iya madah.
Berindik enggau nya ku iya madah, sida deka nambahka wang turu sepenyampau 10 peratus ungkup raban nya ti berumur lebih ari 55 taun enggau raban OKU ti nyereta diri ba Skim Nyelatan Volunteer.
“Kami pechaya, kerejasama tu entara siti inisiatif ke manah dikena negapka penatai pemisi peranak di menua tu,” ku iya nambah agi.
Nengah MoU tu, Grab deka meri insentif baka bayar nyelatan KWSP penambah sepenyampau lima peratus tauka maksimum RM80 tetiap taun ngagai deriba enggau raban nganjung pemakai ti berumur baruh ari 55 taun ke mayar nyelatan nengah program i-Saraan KWSP.
Kelimpah ari nya, deriba enggau orang nganjung pemakai ti berumur lebih 55 taun ti bisi mayar nyelatan peneka ati diri KWSP deka nerima peratus nyentuk ke maksimum RM120 tetiap taun.
Serikat nya mega deka mayar nyelatan sepenyampau 10 peratus tauka maksimum RM120 tetiap taun ungkup raban OKU ba semua tikas umur ke udah mayar nyelatan nengah i-Saraan tauka program mayar nyelatan sukarela KWSP.
