KUCHING, SEPT 7 : “Paedophile” Iya nya mai reti masung nembiak ke baruh umur.
Orang ke masung anak mit ke beumur dua nyentuk ke 16 taun di pelilih Lundu udah ditangkap raban Polis Diraja Malaysia (PDRM) enggau kerejasama raban polis ari menua Australia.
Saspek ke benama Alladin Lanim, 40 taun berasal ari pekan mit Lundu udah ngadu pengawa jai nya sepengelama 14 taun ketegal iya pintar ngelalai pengawa iya ari ditemu opis bekuasa.
Taja pia, polis Australia mujur tetemuka saspek sepengudah bejalaika pengawa tasat ke silik sepengelama dua taun.
Ku Tuai Polis Sarawak Datuk Aidi Ismail madah, suntuk teknologi ti ditapi opis bekuasa ba menua tu enda nyadika penanggul nyapai pemujur enggau kerejasama ti rat ari polis Australia
”Saspek ditangkap di nengeri Sarawak enggau penerang ari polis Australia,”
“Kami udah nemu pengawa iya bepelasarka data polis Australia tang maya nya iya ba luar nengeri iya nya di Semenanjung,”
“Sepengudahnya nya, iya pulai kitu lalu dikuarantin. Nyadi kami nganti iya ngabiska timpuh kuarantin dulu baru kitai nangkap saspek ba hotel nya,”
“Kami ngetan sereta bejalaika pengawa tasat lalu iya madahka diri iya sigi ngaga pengawa nya enggau nembiak lalu madahka diri rindu ke nembiak lelaki,”
“Naka ke diatu, iya mega dituduh,”
Saspek ditan lalu dibai ngagai kort Kuching laban udah ngaga ulah nya ngagai 34 iku nembiak ti beumur 2 ngagai 16 taun.
Alladin Lanim madahka diri iya sigi salah sepengudah iya dituduh 18 kali masung anak mit lalu diukum 48 taun ba jil sereta disebat 15 kali kena 17 hari bulan lapan ti udah.
“Kami mega benung nganti ripot ari forensik laban iya bisi telefon,”
“Ba telefon nya bisi video enggau gambar kitai bedau ngulihka agi. Kami deka bejalaika pengawa nya enti sema bisi penerang ke chukup dalam telefon iya,” ku Aidil madah agi.
Naka ke diatu, polis Sarawak benung chakah bejalaika pengawa meresa kes paedophile agi ba nengeri tu kelebih agi nengah tali arus.
