KUCHING, 27 Mac: Komiti Pengiring Agensi Pemansang Sri Aman (SADA) ngesan tangkup pengawa ti beguna amat dalam netapka kuing tuju enggau pelasar pemansang di Bagi Menua Sri Aman.
Kaban Parlimen Lubok Antu, Roy Angau Gingkoi nyemetak madahka, penumbuh komiti nya deka mantu nisih sereta ngemendarka perambu projek ti dibantaika Komiti kereja SADA.
“Pekara ti dibai ba dalam aum komiti tu mekuhka pemesai guna kerejasama entara semua raban dikena nentuka tetiap inisiatif ulih dipejalaika enggau manah.
“Pemujur semua inisiatif ti udah dilanggur nya mega ngemeratka pengelantang rayat,” ku iya madah.
Iya mansutka jaku nya nengah sebengkah penerang ba laman Facebook pengudah ngulu Aum Komiti Pengiring Sri Aman Development Agency (SADA) Bil. 1/2025 di Kuching, Hari Dua tu tadi.
Roy nerangka, inisiatif ti dibantaika dalam aum nya meri tumpu ngagai pemansang ke meruan, tebal agi ba endur ti dikemansangka ba baruh SADA.
Aum nya dichairmanka Chairman SADA, Dato Sri Rohani Abdul Karim sereta bisi digulu sekeda Kaban Kunsil Nengeri (ADUN), Kaban Parlimen, pemesai perintah sereta pengari ejensi perintah ba baruh administrasyen Bagi Menua Sri Aman.
Sebedau tu, Rohani bisi nyebut pasal Komiti Pengiring SADA udah ngemendarka semilan projek baru ti ngena kos penyampau RM48 juta.
Iya madahka, pemutus nya digaga pengudah sida baum empat kali dalam taun siti nyin kemari di Kuching. – TVS
