SARATOK, 24 Mac: Dua iku melaki bini ke udah lunggar umur bakal sepengudah motosikal ti ditepan seduai iya aksiden ngaul sebuah kerita mayuh guna (MPV) ba Simpang Saratok, tengah hari tadi.
Jurujaku Palan Gerakan Operasyen (PGO) Bomba Sarawak madahka raban sida nerima kangau bekaul kes nya urung pukul 12.19 tengah hari lalu ngerah enam iku kaban ari Balai Bomba enggau Penyah Penusah (BBP) Saratok ngesah ngagai palan penusah nya.
“Penusah aksiden nya ngaul sebuah MPV enggau motosikal, pasinjir orang lunggar umur lelaki bakal ba mua.
“Orang lunggar umur indu bakal ba begian kaki, orang ke deriba MPV nadai sebarang bakal,” ku iya ba siti penerang ti dipansutka sehari tu.
Ku iya madah kededua tudah udah dianjung berubat ke Sepital Pelilih Saratok nguna EMRS bomba.
“Sepengudah nentuka gaya nya likun lalu kerimpak kerita enggau motosikal udah diberesi ba jalai nya, raban bomba mupuk mulaika diri baru ngagai balai,” ku iya. – TVS
