KAPIT : Opis Sungai Sarawak (LSS) minta mensia mayuh tunga ili Tekad Ai Bakun besedia sereta bejejaga enggau peningi tikas ai sungai berengkah ari 8 September tu.
Tu berindik ari operasi nyurutka tikas penalam ai ari Tekad Ai Bakun enggau dipatau sereta dipejalaika ngelama lima minggu ari 8 September nyentuk 12 Oktober 2021.
“Tuju operasi tu dipejalaika kena nentuka ai manggai ba tikas ti selamat,” ku penerang ti dipansutka Opis Sungai Sarawak.
Nitihka penerang nya, tikas ai tunga ili Tekad Ai Bakun dijangka deka niki.
Berebak enggau nya, semua ke bekenaka perengka pengangkut sungai dipinta ngadang ngambika nyeliah diri ari sebarang penusah ti tau nyadi.
Penerang ti silik tau dipeda dalam Palan Servis Komuniti Sarawak Energy Berhad ba lumur 1 300 88 3111.
