KUALA LUMPUR : Mensia mayuh ke deka ngemaruka Lisin Kerita (LKM) tauka Lisin Deriba Malaysia (LMM) ulih ngaduka nya ba semua Pos Malaysia di menua tu berengkah ari 6 September ia nya hari satu tu ila.
Dalam siti penerang sehari tu, Pos Malaysia madahka sida ke udah bisi danji betemu kena ngemaruka lisin ba Opis Perengka Pengangkut Jalai ulih milih sekalika deka neruska danji, endur enggau jam ti udah ditetapka nya tauka ngelawa terus ngagai sekeda pampang Opis Pos Malaysia.
Mensia mayuh mega ulih ngemaruka lisin insurans kerita sida nengah kaunter pos opis tauka nengah tali arus ba laman web sereta aplikasi ti bisi disediaka.
Penerang ti silik tau ditanya nengah ‘AskPos’ ba laman web www.pos.com.my tauka aplikasi Pos Malaysia.,
Kelimpah ari nya, Menteri Perengka Pengangkut Datuk Seri Wee Ka Siong maya Hari Lima madahka, timpuh moratorium kena ngemaruka LKM enggau LMM udah dilanjar ngagai 31 Disember 2021.
Taja pia, ku iya nambah agi, orang ke ngembuan LKM ti udah abis timpuh sah mesti nentuka kerita sida agi bisi insurans ti sah lalu ulih nunjukka setipikit insurans sida lebuh diperesa.
