KUCHING: Sapit Kepala Menteri, Tan Sri Dr James Jemut Masing minta Suruhanjaya Pilihan Raya (SPR) berundingka hari ngundi Pengawa Bepilih Nengeri (PRN) Sarawak patut diatur pengelama dua hari.
Tu ketegal nya ukai pekara ke baru enggau SPR mega udah bejalaika nya maya PRN ke dulu suba.
“Enti enda ulih perundingka nyendia mayuh agi palan endur ngundi. Chara tu ngambika ulih nyeliahka penyekut maya nurun ngundi” ku iya dalam penerang kena Hari Empat.
Masing ke mega Menteri Infrastrakcha enggau Pemansang Palan Penyangkai Kapal madah, kitai mesti pintar bejalaika pengawa dikena nyeliahka pengekai Covid-19.
“Chara bepilih baru tu ba aku siti chara ke pemadu engkeman kitai nyeliah pengekai penyakit Covid-19. Kitai nadai chara bukai enti kitai deka neruska sistem demokrasi. Kitai mesti idup begulai enggau Covid-19,” ku iya.
Nangkanka nya, Mandak Presiden Parti Pesaka Bumiputera Bersatu (PBB), Datuk Abdul Karim Rahman Hamzah minta SPR berundingka proses ngundi chara digital dikena nentuka PRN Sarawak dipejalai enggau selamat.
Taja pia, ku iya madah sebedau dipejalaika SPR mesti nentuka sistem nya nadai meri penanggul.
Ku Karim nambah, chara ke bukai ulih diguna iya nya ngemanjaika timpuh ngundi nyentuk sebulan baka ke udah diatur ba taun 1970an suba.
“Pekara ke pemadu beguna iya nya nentuka proses pengawa bepilih ulih dijaga ari pengekai Covid-19,” ku iya.
Ku iya madah, rayat udah nemu ni bagi parti kedeka diundi sida ila laban diatu kitai ba era digital.
