KUCHING, 16 Feb: Kaban Parlimen Kapit, Dato Sri Alexander Nanta Linggi, dipadu baru nyadi Sekretari Besai Parti Pesaka Bumiputera Bersatu (PBB) ungkup timpuh tiga taun.
Pengawa nyiri iya dipadahka Presiden PBB, Datuk Patinggi Tan Sri Abang Johari Tun Openg, nyerumba Aum Besai PBB Ke-16 ke benung diatur ba Palan Konvensyen Borneo Kuching (BCCK), Hari Minggu.
Ku Abang Johari, pemutus nya digaga pengudah berandau enggau Sapit Presiden sereta Mandal Presiden Kanan PBB sebedau ke disetuju bala deligit ari 82 pampang parti.
“Pengudah berandau enggau Sapit Presiden PBB sereta mega Mandal Presiden Kanan, kitai merambu nyiri baru Yang Berhormat Dato Sri Alexander Nanta Linggi,” ku iya.
Nanta, sebedau tu endang mangku penuduk nya, dipelaba deka terus bejalaika tanggungpengawa besai dikena negapka agi kuing tuju enggau organisasyen parti nuju pengawa bepilih besai nengeri enggau Parlimen ke deka datai.
Pengawa nyiri tu mega endang sebagi ari atur nempa komiti baru Supreme Kaunsil PBB ungkup renggat 2025-2028.-TVS
