KUALA LUMPUR, 6 Feb: Program Sumbangan Asas Rahmah (SARA) ti sebedau tu semina dipejalaika ba Semenanjung Malaysia diatu udah dikerembaika ngagai Sarawak, ke alai bantu nya udah meri pemaik ngagai 100, 000 iku raban seranta.
Menteri Pekara Wang Dua, Datuk Seri Amir Hamzah Azizan madahka, pengawa ngagihka SARA diatu dipejalaika sechara ninting bulan nengah Mykad, lalu tetiap penerima deka bulih bantu penyampau RM100 sebulan ari Januari nyentuk March, sebedau penyampau nya ditikika ngagai RM200 berengkah April tu.
“Penerima SARA di Sabah enggau Sarawak berengkah bulan Januari 2025 iya nya urung 210, 000 penerima ti udah ditemu dalam rikod eKasih nitihka gerup iya nya penerima SARA Sabah bisi 110, 000 iku, lalu penerima SARA Sarawak iya nya bisi 100, 000 iku.
“Baka ti udah dipadahka ba saut keterubah aku tadi, 5.4 juta penerima Sumbangan Tunai Rahmah (STR) mega deka nerima bantu tambah SARA berengkah bulan April 2025. Tu nyengkaum ari 700, 000 penerima SARA ke bisi sereta 4.7 juta penerima STR,” ku iya.
Iya nerangka, naka 5 Februari tu tadi, penyampau 78 peratus penerima ruang bilik di Sarawak udah berengkah ngena bantu SARA sida ba kedai runchit nyengkaum ba kandang menua pesisir.
Tandu iya, perintah mega komited deka nambah penyampau kedai runchit ti berejister ngambika lebih mayuh penerima, tebal agi ba menua pesisir bulih akses meli barang ti diguna ninting ari enggau lebih mudah.
“Sesyen matau ba sesebengkah palan tetemuka pejalai program SARA nerima sambut ti manah ari penerima SARA. Bepelasarka timbal, timbal ke manah nya mandangka rayat muntang ngena MyKad ungkup bejalaika atur pengawa enggau perintah.
“Kelimpah ari nya, mekanisme SARA mudah diguna laban enda ngaul aplikasyen ti bebida enggau MyKad mudah dikena baka ungkup pengawa mayar nengah kad debit tauka kad kredit,” ku iya.
Kelimpah ari nya, amir madahka, perintah mega meri jamin senentang pengawa matau deka dipejalaika sechara bekala dikena nentuka nadai raban ti nangkup penetap tinggal ari nerima bantu nya.
Kena bulan januari tu tadi, Opis Menteri Pekara Wang (MOF) dalam siti penerang madahka, pengawa ngagihka bantu SARA ngemataka bantu betaga nya bisi dikemanahka nyengkaum sebagi ari agih belanja dalam bajet 2025 bagi STR enggau SARA ditambah ngagai RM13 bilion enti dibanding RM10 bilion ba taun nyin kemari.
