SERIAN, 31 Jan: Empat kandang endur udah dikelala nyadi palan ke tebunsa ampuh bah ba sepanjai Jalai Pan Borneo (LPB) Sarawak.
Menteri Kereja Raya, Datuk Seri Alexander Nanta Linggi, madah ke ampuh bah nya nyengkaum ba Jalai Pakej 03 ari Serian ke Sri Aman, Seksyen Selangau, pusin P di kilometer KM818 di Seksyen Simpang Bakun enggau Pakej 11 di Seksyen Pujut semak Eastwood Golf & Country Club di KM938-940
“Nyadi tu mih empat bengkah endur nya, pemadu balat ditu (Pakej 03 ari Serian ke Sri Aman) laban ai nyegang ari sungai ke semak.
Taja pia, nadai kebuah nutup jalai tu laban agi ulih tengah entukar lalu pengelikun penguna jalai raya tejamin laban bisi pegawai matau kandang endur tu,” ku iya.
Nanta mansutka jaku nya pengudah ngabas Jalai Pan Borneo Pakej 03 jalai ari Serian ke Sri Aman, ditu, pagi tadi.
Berebak enggau nya, Nanta mega meri terima kasih ngagai Opis Kereja Raya (JKR) Sarawak laban udah lengkas ngaduka jalai ngelaung sepengudah penyadi tanah tusur, nya ukai semina mandangka penyikar sida tang mega komitmen tinggi dalam nyaga pengelikun penguna jalai raya.
“Baka ba sitak aku di Sipan Temalat Song, sida udah berumban nunjuk ngagai aku siti video naka tu udah bisi jalai ngelaung. Nyadi aku dipadahka kalai nya deka diaraka batu ngambika enda lichin lalu aku empu deka ngabas jalai nya pagila,” ku iya.
Kemari, Jalai Song/Sipan-Temalat ditutup ngagai semua kereban pengangkut laban bisi tanah tusur ngujungja jalai nya putus ari Kanowit ke Song.
Pengawa nutup jalai nya enda lama ngabika raban bekaul ulih ngaduka jalai ngelaung ungkup mensia mayuh ti ngena kereban pengangkut ke mit.
Taja pia, entukar besai empai dikemendar nengah jalai nya laban pendiau tanah bedau teguh sereta enda likun ditengah.-TVS
