BETONG, 26 Jan: Tiga bengkah projek besai di Sarawak ditaga ulih tembu dalam taun tu, ku Datuk Amar Douglas Uggah Embas.
Sapit Premier Sarawak ke mega Menteri Infrastruktur enggau Pemansang Penyangkai Kapal (MIPD) nya madahka, projek nya nyengkaum Jematan Batang Lupar No. 1, Jematan Sungai Lingga enggau Jematan Batang Saribas.
“Terima kasih (Premier Sarawak) ketegal pemujur iya nyadi ketuai ba baruh Gabungan Parti Sarawak (GPS). Kami ulih bejalaika projek jematan besai sereta mega Stolport di Betong.
“Nya alai, aku temegah ati madahka status projek tu, iya nya Jematan Batang Lupar No. 1, jematan pemanjai 4.8 kilometer deka tembu kena 31 Disember 2025, Jematan Sungai Lingga (11 Februari 2025) enggau Jematan Saribas (Pakej 02) deka tembu kena 18 Mei 2025,” ku iya.
Iya mansutka jaku nya rambau Program Bejadika Aum Pengari Pampang Parti PBB Zon Betong, ba Diwan Tan Sri Stephen Kalong Ningkan, ditu kemari.
Nangkan ke nya, uggah madahka, tiga agi projek jematan ke benung dipejalaika diatu disadang tembu ba taun 2026.
Projek nya mungkur Projek Batang Lupar No.2, Jematan Batang Saribas 2 (Pakej A4), enggau Projek Jematan Sungai Krian.-TVS
