KUCHING: Atur Nagang Pemindah Diteritka Agi (PKPD) dipejalaika ba enam genturung pendiau, ia nya dua di Sebauh lalu Bintulu, Lubok Antu, Limbang, Simunjan bela siti.
Ku Komiti Mutarka Penusah Ngenyit Nengeri (JPBN) Sarawak, PKPD di Sebauh dipejalaika ba Rumah Renga Anak Layang, Sungai Senggam, Jalan Sebungan, enggau Rumah Ugop Anak Umpin, Nanga Sigu, Pandan, berengkah ari 30 Ogos ngagai 12 September 2021.
Di Bintulu, PKPD ngaul Rumah Sating Anak Bundan, Km 67, Jalai Bintulu/Miri, ti mega berengkah ari 30 Ogos ngagai 12 September 2021.
Nangkanka nya, Rumah Manai, San Panjai di Lubok Antu enggau Rumah Manggi, Kampung Menuang Baru di Limbang sama bejalaika PKPD berengkah ari 31 Ogos ngagai 13 September 2021.
Pia mega, PKPD di Pekan Sebangan, Kampung Lutong enggau Kampung Menek, Sebuyau, Simunjan berengkah dipejalaika kena 1 ngagai 14 September 2021.
JPBNS mega madah, nadai genturung pendiau ti dilanjarka timpuh PKPD maya Hari Dua.
“PKPD ba 14 genturung pendiau udah diketuka kena 31 Ogos 2021, nyengkaum Kampung Krangan Jaya, Kampung Krangan Engkatak, Kampung Krangan Tekalong, Kuarters Salcra Melikin, Kampung Krangan Baru, Kampung Junggu Mawang, Kampung Krangan Trusan enggau Kampung Sungai Menyan Cina semua di Serian.
“Di Kuchingm PKPD diketuka ba Kampung Goebilt enggau Kampung Quop,” ku JPBN Sarawak.
“Lalu genturung pendiau bukai ti udah diketuka PKPD ia nya ba Rumah Patrick Andin anak Uli, Sungai Serakit di Sebauh, Rumah Machau, Nanga Kumpang, Engkelili di Lubok Antu, Rumah Edwin Engkulau Anak Jelani, Nanga Belungai di Tatau, enggau Rumah Paberi Magelit, Sungai Menok, Lapok, Tinjar Beluru.
Kelimpah ari nya, Sarawak ngerikodka 2,285 kes positif baru COVID-19 enggau dua kes pemati kena Hari Dua.
Ari penyampau nya , Kuching mengkang ngerikodka kes pemadu tinggi, ia nya 1,129 kes , Bau (228 kes) , Serian (113 kes) enggau Lundu (93 kes), Samarahan (81 kes), Bintulu (76 kes), Sibu (71 kes), Mukah (61 kes), Simunjan (60 kes), Subis (59 kes), Miri (54 kes), Limbang (41 kes), Song (34 kes), Tebedu (32 kes) Pusa (21 kes), Tatau (20 kes), Betong (16 kes), Sri Aman (15 kes), Kapit (13 kes), Asajaya (10 kes), Lubok Antu (10 kes), Bukit Mabong (8 kes), Sarikei, Belaga enggau Selangau (7 kes), Beluru (5 kes), Kanowit (4 kes), Dalat (3 kes), Matu (2 kes) lalu Meradong, Lawas, Julau, Pakan enggau Sebauh (1 kes).
Tu nambah penyampau semua kes positif COVID-19 di Sarawak ngagai 116,558 kes.
JPBN Sarawak madah, ari 2,285 kes baru ti diripotka nya, 358 iku bisi ngayanka kelai kena rampit igi penyakit COVID-19 lebuh beperesa pengerai.
Entudi ke nya, bisi 1,580 kes baru udah gerai sereta dikemendarka pansut ari sepital.
Tu nambahka penyampau semua kes positif COVID-19 ke udah gerai enggau dikemendarka pansut ari sepital ngagai 89,919 iku.
Penyampau kes ke agi diubat enggau diengkah ba PKRC sereta wad sepital ia nya 25,907 iku.
Bisi 131 kluster mengkang aktif di Sarawak.
Titihka TVS ba Telegram, Facebook,Twitter, Instagram, TikTok enggau YouTube.
