Kuching: “Agi Idup Agi Ngelaban”! Nya meh leka panjung Sarjan ( B ) Dajai Anak Anggie (PGB) lebuh iya betimbak ngelaban munsuh kelia.
Tu jerita ti ditusui Dajai lebuh sida ngelaban munsuh ba Sungai Kedup suba.
Maya nya, Koperal Renjer Dajai enggau tim iya diasuh bejalaika pengawa nginau ba dalam kampung di Bintangor. Operasi Ngayau tu diketuaika Ex-Sarjan Mileng Kilong ke berasal ari menua Kapit, lalu entara sida ke bisi dalam platun tu ia nya Renjer Unggek Antin, Koperal Malang Sabar, Koperal Berawi Jaraee, Lans Koperal Liman Japok enggau Lans Koperal Ukar Belit.
Kelimpah ari nya bisi mega sida ke bukai baka Renjer John Unjang ari menua Saratok, Nyambong Bansa, Josing Nakid, Arshad Shahrin ari Ipoh di Perak, Sandom Embin, Balau Jalong, Rimau Buda, Simahbut Subikan, Nyuak Kuyat enggau Linang Ngumbang.
Lebuh sida diau ba sebuah langkau kusung, ari siti sida deka ngambi bekal pemakai laban ti udah abis ketegal beminggu-minggu bemalam ba kampung.
Kena 28 Oktober taun 1971, urung pukul 5.45 lemai, sida ke diau di langkau kusung ba Sungai Kedup diserang munsuh.
Baruh rumah ti alai sida diau udah ditanam raban munsuh bom ti digaga sida iya empu. Sungai ti enda jauh ari langkau nya mega enda tentu besai, ku Dajai.
Lima belas iku ari sida diasuh nguan langkau lebuh bala platun ke bukai udah datai, lalu dua iku agi renjer, iya nya Arshad enggau Simah, diasuh nyaga luar langkau. Maya nya nyerumba bulan Ramadan, lalu bala sedadu Melayu endang udah berengkah nyendiaka pemakai diri empu.
Ku Dajai, lebuh sida bemalam ba langkau nya, urung pukul 5.45 pagi, sida ninga munyi utai meletup enda jauh ari endur sida bemalam. Sebedau bom meletup, siku ari ‘guard’ sida bebadi laban ditimbak munsuh, ia nya Niang Nyabong.
Sida lalu bebalas timbak pengelama lebih kurang dua ngagai tiga minit.
Dia Dajai lalu ngasuh Arsyad muka radio sida ngambika madah ngagai Opis RASCOM di Sibu sida diserang munsuh lalu minta mantu sida. Enda lama udah nya, radio sida ditimbak munsuh ti ngujungka sida enda ulih bejaku agi enggau raban RASCOM di Sibu. Mujur sida iya sempat madahka penusah sida.
Ku iya agi, lebuh bala platun bendar begigaka senyata dalam petang, bisi 30 iku munsuh enda ngetu nimbak langkau kebun nya. Nyau lama udah nya, sida ngetu nimbak lalu iya bisi ninga munsuh manjung bejaku dalam jaku Iban madahka manah agi sida nyerah diri.
“Kebendar munsuh udah nyidi pejalai kami lalu nemu kami semina bisi 17 iku aja“, ku Dajai.
Tang Dajai enda mudah nyerah alah lalu bediri sereta manjung “Agi Idup Agi Ngelaban!”
Nya mih pengering jaku iya dikena mai tim iya bela angkat lalu ngelaban munsuh.
Pegawai Kanan Sarjan Mileng, orang keterubah pansut ari endur nya, lalu nimbak munsuh ngena senapang Bren sereta nikauka bom. Seduai iya Dajai enggau Renjer Unggek sereta Sarjan Mileng nimbak munsuh lalu urung pukul 6.00 pagi, bala munsuh dipeda majak nyurutka diri lalu ngirit bala sida ke balat bakal ketegal ditimbak raban platun.
Urung pukul 7.30 pagi, raban ari Kem Kelupu, Bintangor datai ngesah sida.
Lebuh dirandau pengarang berita TVS, Dajai madah raban sedadu patut nitihka atur ti udah ditetapka tuai sida kelimpah ari ti ngembuan disiplin, kelebih agi sida ke bepegaika senapang tauka senyata.
“Laban tiap iku orang ke nyadi sedadu mesti bisi disiplin, nitihka atur, mendingka jaku tuai, “ ku iya.
Ku iya agi, sida kelia berambunka nyawa ngelaban munsuh, tinduk dalam kampung enda bebuka baju, enda bebuka kasut, enda mandi. Semina empungas aja lalu bejalai ngayau begigaka munsuh.
Berindik ari Ops Ngayau, sida teulihka lima iku munsuh, ke bukai semina bakal , ku Dajai. Bala munsuh ke datai nyerang sida bisi lebih 30 iku. Dia sida tetemuka guni ke alai sida munsuh ngengkah sida laban ke ngumbai sida iya ulih mati magang.
Dajai, ke asal ari Betong, nangkan bala nembiak anang enda ngasika jaku bala tuai lebuh ngatur pengawa enggau ngereja utai.
Lebuh ditanya senentang pemedis sida kelia maya ngenanka bansa enggau menua Malaysia, iya madahka pengawa sida endang amat pedis.
“Aku ngasaika agi kelia, lebuh bejalai ngenanka menua, lebuh masuk kampung endang beminggu-minggu, bebulan-bulan, enda mandi, semina bepungas aja. Kasut enda dibuka, baju enda buka,” ku iya.
Pesan kepenudi ku Dajai, iya ngarapka bala raban sedadu ke agi gawa meruan nyikap diri ninting maya lebuh bejalaika pengawa.
“Aku mega deka mesan ngagai bala veteran, bala ke udah pinchin ari sedadu, arapka kitai bela ngingatka pemerinsa kitai ke udah nyaga menua ngelamatu,“ ku iya.
Sarawak Renjer tu raban sedadu ke chukup tebilang di Sarawak lalu sida mega digelar tim sedadu pemadu berani sereta dipebasa ba Malaysia. Pemerani sida ukai semina diaku ba menua tu tang mega ba menua luar baka Britain, Indonesia sereta menua bukai.
Siku Tuai British di Tanah Melayu, ia nya Sir Gerald Templer, kala madah, raban Sarawak Renjer siti tim ke pemadu tebilang ba dunya lalu iya ngelar raban sida tu ‘The Sarawak Headhunters’.
Sarjan Dajai Anak Anggie (PGB) asal ari Rumah Sibat Ak Banyan, Penurin, Betong, Saribas, lalu iya ada kena 15 Ogos taun 1945.
