PADAWAN: Siku lelaki rugi RM70,000 sepengudah ditipu ‘Macau Scam’ di Padawan kena Hari Minggu.
DSP Lim Jaw Shyong madahka, lelaki ti beumur lebih kurang 30 taun nya nerima kangau telefon urung pukul 3.00 lemai ari siku orang ti madahka diri pegawai ari Lembaga Hasil Dalam Negeri (LHDN).
Nengah kangau telefon nya, orang nya tadi madahka serikat iya di Kedah bisi chukai ke bedau bayar sepenyampau lebih RM17,000.
“Taja pia, lelaki nya madahka diri nadai ngembuan serikat di Kedah. Sepengudah nya kangau telefon nya disambung ngagai siku agi lelaki ke madahka diri polis lalu nerangka serikat tudah ke ditipu nya bisi bekaul enggau pengawa salah guna wang.
Berindik ari nya, lelaki tu ditipu lalu udah meri semua penerang iya nyengkaum lumur akaun bank.
“Lelaki nya mega udah nyerahka lumur Kod Sah Transaksi (TAC) bank ngagai saspek,” ku Lim madah ba siti penerang.
Lelaki ke ditipu tu lalu ngechek akaun bank pengudah nya baru nemu RM50,000 udah dipindahka ngagai akaun bukai ke diempu orang bukai.
“Sepenyampau RM20,000 agi udah dipindah ngagai lumur akaun ke bukai,” ku Lim nambah agi.
Lelaki nya pan ngaga ripot polis enggau kes ditasat ba baruh Seksyen 420 Kanun Keseksaan.
Nangkanka nya, Lim ngelalau mensia mayuh ngambika enda mudah ditipu sereta takut enti sema bisi orang betelefon madahka sida bisi chukai enda dibayar tauka bekaul enggau kes salah guna wang.
Sebarang penerang ulih betelefon terus ngagai Opis Tasat Pengawa Jai Komersial tauka Whatsapp ba lumur 013-211 1222 tauka ngelawa laman web t ccid.rmp.gov.my tauka enti deka ngechek lumur akaun ulih ngelawa http://ccid.rmp.gov.my/semakmule/
Titihka TVS ba Telegram, Facebook,Twitter, Instagram, TikTok enggau YouTube.
