KUCHING, 12 Jan: Pemansang enggau penumbuh sukut pengarap raban nembiak beguna amat dikena nyapai juluk sarawak nyadi wilayah ti maju sereta inklusif, ku Datuk Patinggi Tan Sri Abang Johari Tun Openg.
Premier Sarawak nya madahka, penyulut sesebengkah wilayah ukai semina dipeda nengah sukut fizikal aja, tang mega nengah pemansang mensia.
“Kitai ngembuan juluk deka nempa Sarawak ti bisi daya semekih, inklusif sereta meruan. Lebuh kami nyapai visyen deka nyadika Sarawak seruran lantang, kami ngaku raban nembiak nyadi aset pemadu besai kitai.
“Sida nampung pengawa kitai jemah, lalu pemansang enggau sida ngesan tanggung pengawa ti beguna amat dalam nyungkak penyulut nengeri,” ku iya.
Iya madah munyi nya nengah teks jaku iya ke dibacha Menteri ba Opis Premier Sarawak, Dato Sri John Sikie Tayai, rambau Pengerami Bejadika Sarawak Blessed Church (SBC) di Kuching, Hari Enam tu tadi.
Abang Johari nerangka , institusyen jalai pengarap di Sarawak mega mantu nempa komuniti ti bepengarap, beserakup sereta bebasaka pangan diri.
“Komuniti kitai ti bemacham bansa enggau jalai pengarap nyadi berekat lalu gerempung baka Sarawak Blessed Church (SBC) bejalaika tanggungpengawa ti beguna amat dalam nerenakka pengelantang enggau ulah bebasaka pangan diri,” ku iya.
Ba pengerami nya, SBC mega bisi meri turu sepenyampau RM50,000 ngagai 13 gerempung pengintu pengelantang nyengkaum Gerempung Orang Nyelai Pendiau (OKU) Kuching, Gerempung Orang Buta Sarawak enggau Gerempung Penyakit Riman Anak Mit Sarawak (SCCS).
Sama bisi datai, Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting, Direktor UNIFOR, Dato Georgina Apphia Ngau enggau Pastor Kanan SBC, Pastor Lim Gee Tiong. -TVS
