SPAOH, 26 Dis: Pemanah ukir asal tauka motif tradisional ke dijait ba Baju Kebaya Dabung ngujungka semua Baju Kebaya Dabung ke dijait Puan Roselind Cheraring Mulok, 60 taun ari Rumah Panjai Edmund Sujang, Engkerebai, Anyut Paku, Spaoh meruan laku sereta dikerinduka mensia mayuh di pelilih Spaoh enggau Betong.
Roselind ngembuan peneleba lebih 39 taun nampung seni pesaka ngaga Baju Kebaya Dabung ari niang ibu iya, ngaku diatu chakah baru ngaga baju kebaya nya bekau ari jaku peransang Datin Amar Dato Doreen Mayang ke mega bini Sapit Premier Sarawak merangkap ADUN Bukit Saban ti ngasuh iya ngidupka baru seni Baju Kebaya Dabung ke kala digaga iya ba taun 2017 suba.
“Taun 2017 suba Datin Doreen Mayang meransang kami belajar ngaga baju dero.
“Udah nya, mayuh kami belajar lalu kelas nya tamat dalam bulan Mei 2017.
“Kami lalu dasuh iya (Datin Amar Dato Doreen Mayang) ngaga baju lalu berengkah ari nya aku ngaga baju dero tauka baju dabung sampai ke diatu.
“Pemayuh baju udah tembu digaga aku semak 200 iti, kenyau ari nya mih aku nadai ngetu sampai ke diatu,” ku iya.
Ku iya nengah bantu mesin jait karan ke diberi Sapit Premier Sarawak, Datuk Amar Douglas Uggah Embas empu, diatu iya ulih nembuka tiga pasang Baju Kebaya Dabung dalam sehari tauka teulihka asil manggai RM2,000 sebulan bepanggai ngagai peminta penguna.
Beduduk ari industri ngagai Baju Kebaya Dabung bisi potensial ke besai dikerembai nyadi pun penatai pemisi nyadi rebak baru anang enggai nguji sama enggau ngasilka Baju Kebaya Dabung ngambika iya meruan dipeda.
“Aku meda mayuh endar orang rindu ngena baju tu baka maya Hari Gawai enggau pengerami bukai.
“Nyadi ba runding aku, enda patut (baju tu) enda maju. Nya alai, aku ngarapka sida ke biak-biak nya belajar mih baka kami ngambi bisi nampung pengawa kami jemah,” ku iya.
Berebak enggau nya, indai ngagai empat iku anak tu madah diri berasai temegah sereta muji sukung ke udah dipandangka Datuk Amar Douglas Uggah Embas enggau bini iya dalam ngangkatka pengawa ngaga Baju Kebaya Dabung lebih agi di Spaoh, Betong.
“Gaga amat aku meda mayuh endar udah ngaga Baju Dabung tu.
“Nyadi enda lebu sida Datuk Amar Douglas Uggah Embas ngansak kami ba rumah panjai tu ngaga Baju Dabung, ngarapka jemah ila enda putus mih (pengawa ngaga) Baju Dabung tu,” ku iya.
Iya mansutka jaku nya rambau dirandau TVS ba rumah iya empu di Engkerebai Anyut Paku Spaoh, empai Lama.
Ke penerang, Baju Kebaya Dabung chukup tebilang dikena bala indu Iban di sitak Bukit Saban, Betong kenyau ari taun 1930 -an kelia.
Baju tu suah dipeda dikena bala sida ke indu maya Pengerami Gawai, Melah Pinang enggau maya ngintu pengerami ke bukai.
Baju Kebaya Dabung tu digaga ari kain tenun puang lalu dijait ngena ubung pintar alur ti bekualiti tinggi.
Kelimpah ari ukir asal, bisi mega motif bukai digaga ba baju tu baka burung, ikan, utai tumbuh enggau utai idup ba kampung jerung bepanggai ngagai kretiviti orang ke ngaga.
Penumbuh raban Komuniti Kraf Baju Kebaya Dabung Bukit Saban endang datai ari buah penemu Datin Amar Dato Noreen Mayang ba taun 2016 lalu naka tu bisi dipasuk 276 iku nembiak ari 20 buah rumah panjai di sitak DUN Bukit Saban.-TVS
