KUCHING, 23 Dis: Opis Menteri Pemansang Indu, Nembiak Mit Enggau Pengelantang Komuniti (KPWK) udah ngungkupka agih penyampau RM10.75 juta ari 2018 nyentuk bulan Disember tu dikena munaska kes salah nguna dadah di Sarawak.
Menteri KPWK Sarawak Dato Sri Fatimah Abdullah, madahka insiatif nya sebagi ari pengawa perintah Sarawak nengah Komiti One Stop Committee (OSC), ti betuju nagang aktiviti nyadung enggau salah guna dadah, seraris enggau opis kastam diraja malaysia (JKDM).
“JKDM Sarawak udah bekerejasama enggau opis menteri nengah OSC dikena MIDS Sarawak ngulihka empat mesin ninjau bepelasarka Pemintar Artifisyel (AI) dikena nyidi barang ke ngundan narkotik.
“Tiga iku Ukui Penyidi Dadah (APD), dua buah kerita APD enggau pengawa ngaga rumah APD ngena geran khas Pelan Tindakan Bersepadu MIDS Sarawak ti diberi perintah Sarawak penyampau RM3,012,000,”ku iya.
Fatimah mega madahka, agih ke diberi nya enda nyengkaum geran khas dikena ngulihka mayuh macham perengka, mesin sereta instrument taktikal dikena bejalaika pelin pengawa sama segulai MIDS Sarawak ke ngena kos RM5.38 juta.
Berebak enggau nya, Fatimah nerangka, pasal pemujur entara taun 2018 nyentuk ke bulan Oktober 2024, dadah ke berega RM255 juta mujur dirampas Polis Diraja Malaysia (PDRM) sereta JKDM di Sarawak, seraya reta pengidar berega RM29 juta mega udah dirampas.
“Bisi 4,349 iku penyadung dadah udah ditangkap PDRM enggau JKDM di Sarawak.
“Udah nya, bisi 69,202 kes tangkap ngaul bemacham penyalah salah guna dadah enggau substans.
“Ari penyampau nya, bisi 73.56 peratus tauka 50,910 kes tangkap ngaul penyalah ngena enggau gian dadah,”ku iya.
Penerang bekaul enggau aktiviti salah guna dadah enggau substans ulih diripotka nengah whatsapp tauka lumur telefon nadai bebayar tu, nuju JSJN nengah lumur 012-2087222 sereta AADK (019-626 2233) enggau JKDM (1800-8888-55).-TVS
