KUCHING: Menteri Raban Nembiak enggau Lumba Datuk Abdul Karim Rahman Hamzah mantaika pengaga ati iya berindik ari pemujur ti dijapai Atlit Para Menua, Bonnie Bunyau Gustin ke udah bulih midul emas ti keterubah menua ba hari keempat Lumba Paralimpik.
Iya madahka penyulut Bonnie nyadika perais ti chukup berega ungkup genap iku rayat Malaysia, lebih agi Sarawak beserimbai enggau Hari Kebangsaan 2021 ti deka disambut ba ujung bulan tu.
“Aku chukup gaga ati sehari tu laban lagu Negaraku ditebah enggau tambai Jalur Gemilang kepai-kepai ba menua Jepun. Aku nengah awak tu meri pengaga ati ngagai Bonnie Bunyau Gustin laban udah mujur bulih midul emas ti keterubah Malaysia ba Lumba Paralimpik serak tu,” ku iya madah nengah laman Facebook maya hari Enam.
Abdul Karim madahka, midul emas nya entara penyulut pemadu manah Pekit Angkat Berat menua kenyau ari taun 2008.
Atlit ke asal ari Serian, Sarawak nya mega ngemegahka menua sepengudah mujur mechah rikod Paralimpik ke kala dipegai Rasool Mohsin ari Iraq ba Rio taun 2016 iya nya 227 kg, angkat pemerat 228 kg lebuh nguji kali ketiga ba hari keterubah lumba nya.
“Tu perais ke chukup berega ungkup rayat Malaysia lebih agi kitai deka nyambut Hari Kebangsaan 2021 ujung bulan tu,” ku iya madah agi.
Titihka TVS ba Telegram, Facebook, Twitter, Instagram, TikTok enggau YouTube.
