BINTULU: Sekeda ari genturung pendiau ba Bintulu deka bejalaika Atur Nagang Pemindah Diteritka Agi tauka PKPD ba pun minggu baru.
Nitihka ripot ari Unit Komunikasi Awam Sarawak (UKAS), Kaban Parlimen Bintulu Datuk Seri Tiong King Sing madahka PKPD nya dipejalai ketegal kes COVID-19 bisi diripotka ba genturung pendiau.
Mayuh kes kelebih agi diripotka ba sekeda palan pengentap pendiau enggau genturung pendiau (kandang endur berumah) ba mengeri Bintulu.
“Seharitu kitai udah neritka atur nagang pemindah ba Taman Jason sepengelama seminggu laban bisi ngerikodka 20 kes, lalu bisi sekeda genturung pendiau benung dikemata sereta deka bejalaika atur ti sama,” ku Tiong madah lebuh dirandau media sepengudah iya ngabas proses Pengawa Nyidi Kes Aktif (ACD) ba Taman Jason maya Hari Lima.
Beduduk ari nya, Tiong ngelalau peranak ke mendam di Bintulu, lebih agi sida ke diau ba mengeri, ngambika anang pulai ke rumah panjai tauka menua diri naka ke diatu.
Iya mega minta peranak ke diau ba rumah diri ba mengeri anang pansut ari rumah enti sema nadai kebuah ti berat.
“Enti deka meli bekal pemakai, anang mai anak kita ke beumur baruh 12 taun. Nembiak ke beumur 13 enggau 14 taun pan anang mai enti ulih,” ku Tiong madah agi.
Tu berindik ari siti kes ti ngaul nembiak beumur 14 taun ke ditetapka positif ketegal nitihka indai iya pansut meli barang.
Enti ulih, semina apai tauka indai aja pansut bebelika barang ti diguna.
Titihka TVS ba Telegram, Facebook, Twitter, Instagram, TikTok enggau YouTube.
