KOTA SAMARAHAN: Berindik agi pengekai igi penyakit COVID-19 ke agi nuntung menua mayuh rayat ke tekeruga ari sukut asil penatai pemisi tauka napi penanggul bukai.
Tu nyengkaum raban orang berikan ke napi penanggul nurun ke tasik enti sema datai ba musim landas.
Beduduk ari nya, perintah nengeri udah ngemendarka duit turu tambah sepenyampau RM9 juta ke nyadi Bantu Musim Landas ungkup orang berikan.
Sapit Kepala Menteri Datuk Amar Douglas Uggah Embas madahka, bantu nya diberi ba pun ari bulan satu nyentuk ke bulan tiga taun baru.
Ku Uggah madah, perintah sebedau tu udah ngemendarka RM15 juta duit turu bantu ke sama dalam taun tu ari bulan satu nyentuk ke bulan tiga enggau ari bulan sebelas nyentuk ke bulan dua belas.
“Duit turu tu iya nya bantu khas ari perintah nengeri dikena ngelempungka tating pengidup orang berikan ke enda ulih nurun ke tasik maya musim landas,” ku Uggah madah sepengudah ngemataka pengawa ngaga indu opis baru Gerempung Peladang Nengeri maya hari Lima.
Iya ke mega Menteri Betanam Betupi Moden, Tanah Adat enggau Pemansang Kandang Menua madahka, bisi 10,000 iku orang berikan dijangka nerima elawin tetiap bulan sepenyampau RM300 nengah bantu nya.
Uggah puas ati meda pengerembai projek nya ke diatu udah nyapai 5.57 peratus lebih tumu ari timpuh ti udah ditetapka.
Projek nya beungkus RM20 juta digaga ba taba pemesai 1.214 hektar berengkah dipejalaika maya 24 hari bulan 9 2020 lalu dijangka tembu kena 24 hari bulan 5 2022.
Titihka TVS ba Telegram, Facebook, Twitter, Instagram, TikTok enggau YouTube.
