KUCHING: Pengawa netapka tanah enggau matau nengah langit bekaul enggau insiden reba kayu enggau apat kayu balak ba Sungai Baleh apin lama ke udah ti dipejalaika Opis Kampung Sarawak (JHS) diterima manah Serakup Kayu Ramu Sarawak (STA).
Ku STA madah, pengawa nya deka nentuka penanggul ke nyadi nya ketegal apat kayu ditulak ke sungai ti ngujungka apat tepekul ba tekat Baleh berindik ari ujan bangat ke enda ngetu.
Iya madahka, penanggul nya ngujungka mayuh orang nganu lalu madahka nya salah serikat kayu ti bejalaika pengawa nebang kayu balak sereta bisi Lisin Kayu Kampung ba Baleh.
“Beduduk ari nya, STA endang nyukung pengawa JHS enggau ejensi ke bekaul ti bejalaika pengawa netapka tanah enggau matau nengah langit senentang penanggul nya nyadi ketegal reba kayu ditulak ke sungai lalu ngujungka tepekul ba tekad Baleh,” ku STA madah nengah siti penerang maya hari Lima.
STA mega nyemetak madahka, operasyen nebang kayu ba Baleh Catchment semina dipejalaika sepengudah nerima pemendar ari JHS enggau sepengudah permit dikeluarka.
Kelimpah ari nya, STA madahka sida nerima empas ketegal penanggul nya lebih agi industri kampung ti ulih ngeruga pemanah industri nya.
Tebal agi, enti sema mayuh orang lenyau pengawa sereta deka ngeruga gaya pengidup rayat di kandang menua nya.
STA ngansak semua orang tauka ejensi ke bisi kuasa ngambika sama besaup napi pemar sereta nyeliahka penanggul baka nya nyadi.
Titihka TVS ba Telegram, Facebook, Twitter, Instagram, TikTok enggau YouTube.
