TOKYO, (Jipun) 16 Dis: Sarawak deka nguji ngasilka hidrogen gadung nengah teknologi Methyl Cyclo Hexane (MCH) dikena ngurangka kos mansutka energi.
Nerang pasal pekara nya, Premier Sarawak, Datuk Patinggi Tan Sri Abang Johari Tun Openg madahka teknologi petrokimia nya ngemudahka pengawa ngasilka hidrogen ti enda ibuh nengah proses reaksyen tambah tauka disimpan.
“Kitai diatu ngembuan Projek H2ornbill, nyadi proses mansutka hidrogen di Sarawak deka ngeluarka MCH , lalu nya deka dibai ke Jipun ungkup guna menua nya.
“Teknologi baru tu engka ulih ngurangka kos ngeluarka hidrogen enggau meri penguntung ngagai kitai nyadi pengeluar hidrogen sereta mega makit, nyengkaum industri ke buka,” ku iya.
Abang Johari bejaku munyi nya pengudah penemuai seraya gawa ke Palan Pemansik Eneos di Yokohama.
Dalam penemuai nya, Abang Johari diberi licha enggau dibai meda fasiliti ngaga kereban api sintetik sereta teknologi ‘Direct Air Capture’ (DAC) enggau MCH.
MCH ti nyadi pemai hidrogen organik chair, ngulihka pengawa nganjung hidrogen dalam kuantiti ke besai.
Kelimpah ari nya, teknologi ‘Direct MCH’ ari Eneos ngemudahka pengawa ngasilka MCH terus ari kuasa ulih dikemaru baka ai enggau solar.
Tandu iya, jipun benung nguji teknologi nya di Brisbane nengah kuasa solar enggau Sarawak nengah chara hidro.
“Keterubah, kitai deka ngeluarka hidrogen enggau bejalaika proses nya di Jipun, tang diatu bisi teknologi MCH, kitai proses terus di Sarawak.
“Kitai melabaka manggai taun 2028, kitai deka ngeluarka hidrogen ngena teknologi baru tu,”ku iya.
Abang Johari nambah, projek H2ornbill enggau H2biscus ti dipejalaika SEDC Energy deka mekalka lebih 240, 000 tan hidrogen bagi tuju pengawa eksport ba renggat pemungkal.-TVS
