ENGKILILI, 16 Dis: Sebuah balai bomba enggau penyah penusah baru di pelilih Engkilili dijangka deka tembu penuh ba taun 2027 ungkup pemaik rayat di sitak nya.
Kaban Kunsil Nengeri (ADUN) Engkilili, Dr. Johnical Rayong Ngipa madahka pengawa ngaga Balai Bomba Kelas D nya udah dikemendarka dalam Langgur Pemansang Malaysia Lumpar Ke-12 (RMK12) enggau agih belanja penyampau RM15.53 juta.
“Bulan November tu tadi maya aum DUN, aku nerima berita manah senentang Opis Bomba enggau Penyah Penusah Kelas D udah dikemendarka ungkup digaga di Engkilili ditu.
“Tu udah dikemendarka dalam Langgur Pemansang Malaysia Lumpar ke-12 tauka dalam Rolling Plan ke-5 ke dipadahka kena 18 Oktober taun 2024 enggau agih RM15.53 juta.
“Balai bomba tu ila deka disikap enggau kuarters sereta deka ngembuan siku pegawai bekuasa sereta mega engka 26 iku raban pekerja enggau dijangka tembu ba taun 2027.
“Terima kasih ngagai Tuhan laban kitai ulih ngaga Opis Bomba enggau Penyah Penusah di pelilih Engkilili tu,” ku iya.
Iya mansutka jaku nya rambau ngemujurka pengawa nutup Program Kimpin Pengelikun Angus ba Rumah Alau Abik di Bua Engkilili, kemari.
Ku terang Rayong enggau pemisi balai bomba baru nya, iya madah, ukai semina deka ngemandakka timpuh respons penusah ngenyit, tang mega meri pengelantang ngagai perayat ba kandang endur nya.
Pengawa ngaga balai bomba nya, iya nya sebagi ari inisiatif perintah deka ngangkatka servis penusah ngenyit ba kandang menua pesisir, seraya nentuka pengelantang rayat seruran tejaga.-TVS
