SARATOK, 13 Dis: Perintah Sarawak nengah Ejensi Pemansang Bagi Menua Betong (BDDA) udah ngemendarka agih belanja sepenyampau RM3.6 juta dikena ngemujurka Program Bantu Perengkaguna Input Betanam Betupi di sitak Kunsil Nengeri (DUN) Krian taun baru.
Kaban Kunsil Negeri (ADUN) Krian, Friday Belik madahka, bisi 1, 200 iku pekebun mit lada enggau sawit di krian deka nerima pemaik ari program ti dibagika ngagai dua renggat.
“Ba taun 2025 tu ila melalui peruntukkan BDDA udah ngungkupka RM3.6 juta kena meri baja sawit enggau baja lada ngagai kitai ke betanam sawit betanam lada di Krian ditu.
“Nya alai sida Opis Betanam Betupi udah meri aku rintai (nama) sapa ke patut diberi bisi 1200 lebih iku dalam rintai nya,” ku iya.
Lebuh ngelansa pasal status perambu ngaga Opis Pelilih Mit Projek Nanga Budu, iya berasai alit ati meda projek nya agi tejanggal laban agih belanja dikena bejalaika projek nya udah lama dikemendarka nengah BDDA.
“Opis baru kitai enti nitih lama udah dikemendar tang sampai ke sehari tu lalu bedau belabuh digaga, tanah pan udah bisi udah dipampas,” ku iya.
Friday madah diri deka terus matau rat tetiap proses sereta pengerembai pejalai projek nya dikena nentuka projek nya bejalai lanchar enggau enda dilanjar agi bagi timpuh ke lama.
Tandu iya, pengawa ngaga begunan opis baru enggau elemen ke bekaul ba Pelilih Mit Nanga Budu beguna amat laban kandang endur nya udah lama diangkat nyadi sebuah pelilih mit.-TVS
