KUCHING: Sepengudah dichiri nyadi menteri ba dalam Kabinet perintah besai Datuk Seri Nancy Shukri besemaya deka nyapai pemujur pemadu manah dalam timpuh 100 hari.
Iya dichiri ke portfolio Opis Menteri Dagang Temuai, Seni enggau Main Asal (MOTAC) pechaya ulih ngenataika servis pemadu manah ba opis menteri ti kala dituaika iya sebedau tu.
“Aku deka meri pengaga ati aku ngagai Menteri Besai, Datuk Seri Ismail Sabri Yaakob laban udah pechaya ngagai aku terus meri servis ngagai rayat nyadi menteri ke megai tanggungpengawa ba MOTAC,” ku iya madah nengah penerang ba dalam laman Facebook maya hari Lima.
Nancy ke mega Kaban Parlimen Batang Sadong mega madahka, iya udah sedia deka napi pemar mantu mulaika pemanah sektor dagang temuai enggau main asal lebih agi ba timpuh pengekai igi penyakit COVID-19.
“Aku deka bejalaika pengawa manah-manah ngambika ulih mantu mulaika pemanah sektor dagang temuai enggau main asal menua kitai,” ku iya madah agi.
Berindik ari nya, iya meransang semua raban kereja MOTAC terus besaup ngemansangka sektor nya seraya nyapai tagit ke udah ditetapka sebedau tu.
