PENGEKAI igi penyakit COVID-19 dipeda ngeruga penumbuh sereta peminta dalam sektor ekonomi sekalika ba renggat menua tauka global.
Beduduk ari nya, perintah senaka ulih deka mulaika baru pemanah ekonomi menua enggau jampat.
Menteri Besai Datuk Seri Ismail Sabri Yaakob nyemetak madahka, rintai Kabinet enggau opis menteri ba renggat perintah ti dituaika iya mesti bisi daya ngesan sereta bejalaika tanggungpengawa ke diberi lebih ransing sereta proaktif.
“Aku arapka rintai Kabinet ke udah dichiri tu deka meri pengandal baru awakka menua terus angkat enggau besaup ngelaban COVID-19 sereta mantu ‘Keluarga Malaysia’ keluar ari penanggul pengidup ketegal igi penyakit tu,” ku iya madah lebuh mantaika Rintai Kabinet perintah besai maya hari Lima.
Nangkan ke nya, iya deka nentuka Kabinet nya ngemeranka budaya kereja ti mandangka prestasi ke tinggi, lalu tetiap opis menteri mesti ngaga pelin timpuh pandak enggau panjai dikena nyapai tagit ke udah ditetapka.
“Berindik ari nya, tetiap opis menteri mesti mandangka pemujur tumu dalam timpuh 100 hari keterubah,” ku iya madah agi.
Ismail Sabri mega meransang semua ngambika besaup, bekerejasama enggau rayat tebal agi lebuh deka nyapai misyen mulaika pemanah menua.
“Taja pia, Kabinet aku tu enda ulih bejalaika pengawa kediri. Kami begunaka sukung semua pengereja pengawa perintah enggau genap iku rayat “Keluarga Malaysia, “ ku Ismail Sabri nambah.
Titihka TVS ba Telegram, Facebook, Twitter, Instagram, TikTok enggau YouTube.
