MENTERI Besai Datuk Seri Ismail sabri Yaakob deka nentuka rintai Kabinet perintah besai komited ngemujurka agenda menua nengah mayuh macham kerejasama entara parti dikena nyungkak pengawa mulaika pemanah ekonomi ungkup pengelantang rayat.
Iya madahka, seririh enggau tunga tuju Pelin Mulaika Pemanah Menua (PPN), aktiviti ekonomi deka dibuka nguna chara berenggat ngambika rayat ulih terus gawa enggau selamat lebih agi lebuh ngiga asil penatai pemisi.
“Rintai Kabinet tu dipilih bepelasarka sida ke bisi peneleba sereta dikearapka ulih mantu mulaika pemanah ekonomi menua seraya nyukung pedagang, ngemudahka chara dagang, ngeranchakka baru aktiviti ekonomi sereta matak mayuh agi pemeranak puku,” ku iya madah lebuh madahka Rintai Kabinet perintah besai maya hari Lima.
Ismail Sabri madaka, Kabinet tu mesti ngemeratka asil ti bepelasarka ngagai tiga prinsip iya nya seruran beratika peminta guna kemaya hari, bejalaika tanggungpengawa manah-manah sereta lurus ati, sereta mulaika baru pengarap rayat ngagai perintah.
Kelimpah ari nya, iya madahka rintai Kabinet tu mega deka belematika chara ti pemadu baru ke lebih tebuka seraya belalauka aspirasyen ‘Keluarga Malaysia’ iya nya nengah pengawa ngenataika servis enggau penerang ke lebih efisien ngagai rayat.
Titihka TVS ba Telegram, Facebook, Twitter, Instagram, TikTok enggau YouTube.
