KUCHING, 9 Dis: Parti Sa’Ati Rayat Sarawak (SUPP) sempama baka ai tenai tang chukup mayuh nyaup meri penegap enggau pemujur ngagai Gabungan Parti Sarawak (GPS).
Premier Sarawak Datuk Patinggi Tan Sri Abang Johari Tun Openg madah, pekara nya nyata dipeda sepengudah semua tuai tinggi parti nya mujur dipilih baru enggau enda betanding lalu ngujungka penyelap sereta penegap dalam parti.
“Sepengudah iya ulih ngemudi kapal enggau manah, baru iya ulih meri perati ngagai pengawa nyaga bala penumpang ba dalam kapal.
“Enti enda, iya deka napi pemar laban kelalu mayuh gelumbang, lalu enda ulih ngatur situasyen.
“Puji Tuhan kapal SUPP diatu belayar enggau manah ba kandang tasik ke lantang,” ku iya.
Iya madah munyi nya maya bejaku ba Aum Besai Deligit Ninting Taun Parti Sa’Ati Rayat Sarawak (SUPP) ke-26 ba Dewan Sa’Ati , ditu kemari.
Abang Johari mega nerang, SUPP bejalaika tanggungpengawa ke chukup beguna dalam GPS dikena ngemansang Sarawak ngagai tikas ke lebih tinggi nyengkaum nambahka asil penatai pemisi nengeri.
“Nyadi bala kaban ke ngiring GPS, kami gawa begulai dalam siti tim iya nya ngiga chara dikena negapka ekonomi, kami tentu ngelala pengering kami, lalu kami meri komitmen penuh gawa nyungkak penatai pemisi Sarawak.
“Nya mih kebuah, lebih kitai ba pendiau ke chukup tegap, kitai ulih meri perati penuh ngagai pemansang Sarawak enggau pengelantang rayat, lebih agi raban nembiak,” ku iya.
Berebak enggau nya, iya mega nandu pasal langgur ngatur set nengeri nyadi sebagi ari strategi ngatur ekonomi Sarawak seraya numbuhka turu pesaka bansa.
Sama bisi datai Presiden SUPP Datuk Amar Dr Sim Kui Hian ke mega Sapit Premier Sarawak, Sapit Presiden Supp Datuk Seri Richard Riot Jaem, Sekretari Besai Datuk Sebastian Ting Chiew Yew enggau bala tuai ke bukai.-TVS
