DEBAK, 9 Dis: Pengawa ngatur Pesta Debak 2024 mujur nyapai objektif dalam ngatur pengerami nya dikena ngemansang sereta ngangkatka bakat lumba ba raban nembiak ba Pelilih Mit Debak enggau kandang endur ke besemak dia.
Kaban Kunsil Nengeri (ADUN) Saribas, Datuk Mohammad Razi Sitam madahka, pekara nya nyata dipeda enggau penyereta ari kelab nembiak, gerempung ukai dikuasa perintah (NGO) nembiak sereta gerempung nembiak ba sepanjai timpuh lima hari pengerami nya diatur.
”Tu iya nya siti pengerembai ti manah ari sukut penyereta ari raban nembiak enggau aku ngarap nembiak kitai ulih terus chakah baka tu, kelimpah ngambi peluang dalam bidang dagang sereta mega pengawa ngatur aktiviti lumba,” ku iya.
Iya ke mega Sapit Menteri Pemansang Indu, Nembiak Mit Enggau Pengelantang Komuniti Sarawak madah, pengawa ngatur Pesta Debak 2024 mujur muka pantar enggau peluang ngagai raban pedagang mit ba Debak dikena ngelakuka produk jual sida empu.
Tandu iya, pengawa ngatur pengerami nya deka diteruska ba skala ti lebih besai sereta richah agi taun dudi.
Pesta Debak 2024 diatur pengelama lima hari, berengkah ari 4 nyentuk 8 Disember sereta mujur ngerikodka penatai 15,000 iku temuai ngusung pengerami nya.-TVS
