KUCHING, 9 Dis: Siku pejalai kaki bebadi nyawa ti dipelaba kena ‘lantak lari’ sebuah kereban pengangkut ba Jalai Setia Raja ditu, tumu pagi tadi.
Tuai Polis Pelilih Kuching, Asisten Komisioner Farhan Lee Abdullah madahka penusah ti nyadi urung pukul 4.30 pagi ngaul siku lelaki beumur dalam 30-an enggau nadai ngembuan dokumen sekalika penerang diri.
“Berindik ari penusah nya nyadi, tudah dikenuku ke pegawai perubat Sepital Besai Sarawak (HUS) udah nadai ba palan penusah nyadi urung pukul 4.45 pagi,” ku iya dalam siti penerang sehari tu tadi.
Kes ditasat ba baruh Seksyen 41 (1) Akta Pengangkut Jalai 1987 iya nya deriba enggau enda nitihka atur sereta ngujungka pemati.
Beduduk ari nya polis ngelalau mensia mayuh ke bisi meda penusah tu dikearap ulih ngenataika diri ngagai balai polis ke besemak ungkup madahka penerang silik dikena mantu tasat tu.
“Barang sapa ke bisi lenyau diri sebilik tau betelefon ngagai pegawai pemansik trafik, Inspektor Charlie Aloysius ba lumor telefon 014-8682068 /082-259900 tauka ngenataika diri ngagai balai polis ti semak,” tandu iya. – TVS
