PHNOM PENH, (Kemboja): 8 Dis: Sarawak merambu nempa kerejasama enggau Kemboja dalam pengawa ngulihka bekal benih padi ke bekualiti tinggi.
Premier Sarawak Datuk Patinggi Tan Sri Abang Johari Tun Openg madah, Sarawak bisi ati deka nguna pengelandik Kemboja dalam bidang betanam betupi lebih agi ba pengawa ngasilka padi ungkup tuju nyamin bekal pemakai.
“Kemboja iya nya pengeluar padi ke pemadu mayuh, nyadi nyangka siti pengawa deka digaga aku begulai enggau menteri di kemboja iya nya ngiga benih padi ditu ke ulih dikena ngemansangka industri padi kitai di Sarawak.
“Kitai deka beratika sitak menua pesisir ke ulih dikemansangka begulai antara Kemboja enggau sarawak.
“Kitai mega deka ngemansutka beras ungkup jamin bekal pemakai…nyangka teknologi kitai ulih diempu kunsi antara Kemboja enggau Sarawak,” ku iya.
Kemboja iya nya siti ari menua pengeluar padi besai ba rantau tu enggau tebilang laban chara betanam betupi ke ngasi dalam ngasilka bemacham leman padi ke engkeman enggau klimet Tropika.
Sarawak ngembuan tanah ke ami enggau klimet ke engkeman ungkup betanam betupi diperati bisi penau besai endur ngangkatka teknologi betanam betupi ke lebih maju dikena nyungkak asil padi enggau dikena ngurangka kelalu bepanggai ngagai beras import.
Ku Abang Johari kerejasama ngulihka benih padi bekualiti tu ukai semina beguna dikena negapka sektor betanam betupi Sarawak, tang mega dikena nyamin pengelikun pemakai di Sarawak.
Kelimpah ari nya, pemujur ba pengawa tu jemah dikearapka ulih nyungkak pemansang ekonomi kededua menua, laban sektor betanam betupi iya nya siti ari pun penatai pemisi rayat ba kededua menua.-TVS
