ZHEJIANG, (China) 8 Dis: Sarawak bisi penau nyadi palan baru endur beranakka puku antarabansa nengah sektor kacha solar.
Pekara nya dibantaika Kibing Group ti berunding deka muka kilang ngaga kacha solar di wilayah tu nengah aum begulai enggau delegit Sarawak ti diuluka Sapit Premier Sarawak Datuk Amar Awang Tengah Ali Hasan di Shaoxing, Zhejiang, ensana.
Awang Tengah maya aum nya ngelaluka perambu nya laban ulih numbuhka sinergi ba sektor ngerudi enggau ngaga barang ke dikelaku nengah Strategi Pemansang Pasca Covid-19 (PCDS 2030).
“Sarawak ngelaluka pemeranak puku seriris enggau juluk kami dikena nyapai pemansang ekonomi, pengelantang rama enggau pemaik rampa menua.
“Projek kacha solar ke diperambu tu senutuk enggau kuing tuju pemansang Sarawak, negapka ekosistem lokal Sarawak sereta pengawa nuju industri kurang karbon enggau ngalih ngagai energi gadung,”ku iya.
Deligit nya mega bisi nemuai ngagai palan perengkaguna endur palan ngaga barang Kibing Group ke nguna mesin automatik dikena ngasilka barang.
Kibing Group iya nya sbuah serikat ke dirintai dibaruh Bursa Saham Shanghai enggau pengerandang dunya ba pengawa ngaga kacha ngembuan rentayan stok global ke besai enggau nyadi pemekal ngagai serikat tebilang dunya baka Tesla, Saint-Gobain, OPPO, Byd enggau ke bukai.-TVS
