SRI AMAN, 1 Dis: Atur magi tanggungpengawa Opis Parit Enggau Entali Ai (JPS) Sarawak ngagai dua unit endang atur ke nemban, ku Mohd Shafizan Kepli.
Kaban Parlimen Batang Lupar nya madahka, atur nya siti chara tumu dikena perintah Sarawak nyapai status nyadi pemansut besai padi menua dudi hari.
“Aku chukup setuju enggau penemu Premier Sarawak Datuk Patinggi Tan Sri Premier kitai bekaul atur magi JPS ngagai dua unit.
“Nengah unit padi tu seriris enggau juluk Premier deka nempa Sarawak nyadi pemansut padi.
“Nyadi unit tu ngembuan tanggungpengawa enti kitai meda JPS tu (ngelama tu) semina diungkup nyaga siti iya nya semua ke bekaul enggau parit sereta entali ai.
“Lebuh udah dibagi iya deka meras agi numpu ngagai pengawa nanam padi.
“Enti kitai meda ba sitak Sri Aman tu lebih agi ba sitak Stumbin, Lingga enggau ke bukai endang sitak endur nanam padi ke udah lama dilanggur,” ku iya.
Shafizan mansutka penemu maya dirandau rambau Pengawa Bejadika Pesta Benak Sri Aman 2024 di Waterfront Sri Aman, kemari.
Ku iya nengah penumbuh unit baru nya ila deka ngelengkaska agi pengawa perintah ngaga entali ai ke lebih menyana ba sitak umai padi di selampur Sarawak.
Sebedau tu ba sebengkah program ke diatur ba Gedong, dia Premier Sarawak Datuk Patinggi Tan Sri Abang Johari Tun Openg bisi madah tanggungpengawa JPS Sarawak deka dibagi ngagai dua unit opis ba ujung taun tu.
Siti unit deka numpu ngagai pengawa ngemansangka sitak bumai padi dibaruh Opis Menteri Pemakai, komoditi enggau Pemansang Wilayah (MFICORD).
Ku iya, unit baru nya deka disikap perintah nengeri enggau bajet sepenyampua RM1 bilion.-TVS
