SPAOH, 1 Dis : Program ‘Jangkauan Luar’ MLNG Bestari endang chunto pemanah kaul kerejasama antara Perintah Sarawak enggau Petroliam Nasional Berhad (PETRONAS).
Sapit Premier Sarawak, Datuk Amar Douglas Uggah Embas madah kerejasama nya ngujungka sekula-sekula ba menua pesisir diangkatmanah sereta bisi ngembuan perengkaguna ke moden.
“Nengah bantu tu mayuh perengkaguna baru nyengkaum Smartboard nadai agi ngena ‘Whiteboard’ tauka ‘Blackboard’ kami suba ngena Blackboard udah pengajar nulis kami nembiak asuh orang nunda.
“Kitai berasai sinu meda sukung penuh ari Petronas lalu kitai ngarapka kerejasama baka tu ulih dikerembaika ungkup sitak sekula-sekula menua pesisir ke bukai,” ku iya.
Iya mansutka jaku nya rambau Program Jangkauan Luar MLNG Bestari ba Sekula Primari (SK) Paku Central ditu, kemari.
Ku iya, arapka program nya udah tu ila dikerembaika agi ngagai sekula-sekula mision di Sarawak.
Tu beduduk ari sekula-sekula mision di wilayah tu nadai nerima agih ke mayuh baka ke diterima sekula bukai lalu semina ngandalka bantu ari UNIT Pekara Pengarap Bukai (UNIFOR) dikena ngatur aktiviti pemansang.
Ke penerang, Program Jangkauan Luar MLNG Bestasi ba SK Paku Central endang sebagi ari inisiatif Tanggungpengawa Rama Korporat (CSR) dikena nyungkak kualiti pelajar ba sitak menua pesisir.
Projek ke dipejalaika ba SK Paku Central nya beungkus RM800, 000 sereta udah tembu bulan Julai taun tu tadi.
Antara projek ke bisi dipejaika ba sekula nya baka Ngemanahka Buding, Diwan Serbaguna enggau meli kereban ungkup belajar ke guna makmal, aktiviti lumba enggau ke bukai.
Sama bisi datai Kaban Parlimen Betong, Dato Dr Richard Rapu, Direktor Pengatur Pengawa enggau Tuai Pegawai Eksekutif Gerup Serikat Malaysia Lng (MLNG) Sendirian Berhad, Mohamed Syazwan Abdullah enggau ke bukai.-TVS