SRI AMAN, 24 Nov: Siku orang lunggar umur ke beumur 75 taun ti diripotka lenyau kenyau Hari Tiga minggu tu tadi ditemu selamat, pagi tadi.
Tudah Niang Lasa tu ditemu sida serumah empu urung pukul 11.45 pagi ba Sungai Antu, Batu Lintang.
Nitihka ripot, Niang Lasa disahka nadai nama-nama lalu diatu iya udah ba rumah iya empu ba rumah Panjai Ibol, Undop.
Tudah dipechaya nurun ke kebun iya di Sungai Raya Ibol sebedau diripotka lenyau.
Sebedau nya, Kaban Kunsil Nengeri (ADUN) Simanggang, Datuk Francis Harden Hollis bisi bejalai ngabas Pengkalan Ngiga enggau Mantu (SAR) orang lenyau di rumah Panjai Ibol, Undop Sri Aman ke tanda meri sukung ngagai sida sebilik.
Penatai Harden disambut Komendar Operasyen , ASP Leonard Mallaca seraya meri licha pasal operasyen SAR ti dipejalaika.
Operasyen tu ngaul mayuh bengkah ejensi nyengkaum Polis Diraja Malaysia (PDRM), Unit K9 (UKPS), Opis Bomba enggau Penyah Penusah Malaysia (JBPM) , Raban Penyaga Orang Periman Malaysia (APM) enggau pengani rumah panjai.-TVS
