SARATOK, 24 Nov: Pemisi Tadika Publik Saratok kenyau ditumbuh 60 taun ke udah endang nyadi lambang penyerakup pupu bansa di Saratok.
Kaban Kunsil Nengeri (ADUN) Krian Friday Belik madah, tadika nya endang patut dijaga manah ungkup guna komuniti ke diau besemak.
“Sekula sekula China ambi chunto baka SKJC Myn Syn taja 60 tauka 70 peratus nembiak ke belajar ba SJKC Myn Syn dia tebal agi bansa Bumiputera.
“Ba Tadika Public pan sama mayuh agi nembiak besekula ba Tadika Public didinga aku iya nya mayuh anak Bumiputera Melayu enggau Iban.
“Nyadi tu mandangka penyerakup kitai ba Saratok chukup manah laban kitai enda ngira bansa China, Iban tauka Melayu bela ulih begulai.
“Ukai semina begulai sekula tang ulih makai semija nyadi nya sejarah ti mandangka kitai ulih idup berakup dalam komuniti,” ku iya.
Friday mansutka jaku nya maya Pengerami Makai Lemai Ngintu Taun Ke-60 penumbuh Tadika Publik Saratok ba Dewan Sri Krian Saratok, malam tadi.
Ku iya, komitmen tinggi Kaban Kaunsil Direktor Tadika Public Saratok ngetanka penumbuh tadika nya endang patut dichunto.
Bisi 61 iku nembiak benung belajar ba tadika nya sereta diajar empat iku pengajar.-TVS
