SRI AMAN, 21 Nov: Integriti ukai semina nyadi pugu ulah dalam pengidup tang mega nyadi pugu ngagai pemansang sesebengkah organisasyen, komuniti enggau menua.
Ku Pemangku Residen Sri Aman Mahra Salleh, enti nadai integriti pengarap deka pudar lalu ngujungka pengelemi ba mayuh sukut pengidup sekalika nya ari sukut ekonomi, rama enggau adminstrasyen.
Nya alai, ku iya isu pemanah ulah enggau salah guna kuasa sereta makai suap endang nyadi isu besai lalu patut diputarka enggau lenak dikena nyeliahka pengerugi ngagai perintah.
“Integriti ukai semina pugu dalam pengidup tang mega nyadi pugu ngagai pemansang sesebengkah organisasyen, komuniti enggau menua.
“Enti nadai integriti, pengarap deka pudar lalu tu deka ngujungka pengelemi ba mayuh sukut pengidup sekalika nya ekonomi, rama nggau adminstrasyen,” ku iya.
Iya mansutka jaku nya nengah teks jaku iya ke dibacha Pegawai Pelilih Sri Aman, Sharif Bujang maya Pengawa Bejadika Randau Eksekutif Pelilih Pantu enggau Lingga 2024 di Dewan Suarah ditu, sehari tu tadi.
Ku iya, program ke diatur nya enndang seriris enggau juluk perintah dalam nempa komuniti beintegriti sereta ngangkatka menua Sarawak nyadi wilayah maju 2030.
Tandu iya, nya mega nyadi bukti ngagai komitmen perintah dalam ngangkatka kualiti adminstrasyen ke beintegriti dalam meri servis pemadu manah ngagai mensia mayuh.
Ku iya, ulah ke manah baka nya endang patut diterenak sechara penuh mungkur semua sukut pekara ngaul semua komuniti.
Ke penerang, program ke sama bela udah diatur ba Dewan Serbaguna Engkilili sereta bisi digulu sekeda ejensi perintah enggau peribit baka Komisioner Nagang Penyalah Makai Suap Malaysia (SPRM), Opis Kastam Diraja Malaysia (JKDM), Imigresyen, PDRM, Opis Bomba, Opis Rumah Jil Malaysia enggau ke bukai.-TVS
