ROBAN, 21 Nov: Kapitan Thow Ah Soon beumur 74 taun, entara siku tukang ngambuh duku ke agi regas ba pelilih Roban.
Ah Soon chukup dikelala letegap pengeransing ngambuh duku ti bekualiti baka duku chandung enggau duku ilang ti diaris ari niang apai iya empu.
Nyentuk ke sehari tu asil duku kambuh Ah Soon meruan nerima peminta ke tinggi ari pemeli ba pelilih Roban, Saratok enggau Kabong.
Pengudah pinchin ba taun 2005, Ah Soon ngepunka dagang tu enggau serius ba woksyop iya ti bepalan ba Jalai Nyiar, urung 10 kilometer ari Pasar Roban.
“Jam nya suba aku agi mit endang selalu meda sida niang apai selalu ngambuh taja iya begagaka duku ukai ke jual semina dikena bumai, nebas kebun, nebas getah.
“Nya alai, ari nya tadi aku lalu belajar ba iya udah nya maya aku ke agi gawa tadi kala ga aku ngaga duku tangkin diri empu mih nyau pengujung pengudah badu gawa ba taun 2005 laban ke nadai tentu pengawa pengudah pinchin maya nya lalu mupuk-mupuk ngaga langkau alai ngambuh nyentuk kediatu,”ku iya.
Iya ke mega siku apai ngagai empat iku anak ulih ngasilka nyentuk 20 iti duku chandung sebulan enggau asil untung manggai RM1500 bepanggai ba peminta pemeli.
Rega duku chandung saiz mit bepun rega RM120, lalu saiz besai ulih nambahka asil jual iya.
“Duku Chandung nitihka gaya ga bisi mata besai bisi iyaka mit kira seratus dua puluh siti jual aku bisi ga kena ke belanja dapur kami duai melaki bini baka suba sekali bejual dalam sepuluh bilah bisi ga datai ngagai seribu setengah tang enda ga selalu baka nya kekadang aja baka bulan tu nadai,” ku iya.
Ba awak ke sama, Ah Soon madahka pengirau ati iya laban nadai aris ti deka neruska pengawa iya ti ngasilka duku nyengkaum nembiak ti nadai pengerindu dalam bidang nya.
Tang ketegal pengerindu ti dalam, Ah Soon terus puh neruska pengawa nya.
Nya alai, iya ngarap rebak baru ulih meretika seni asal ti ulih nyadi puncha penatai pemisi ke besai nyema dipejalai enggau ati bebendar.
Iya mega ngarap deka bisi raban ke lempung ati mantu ngaga woksyop ti lebih meruan enggau disikap perengkaguna moden dikena ngangkatka produktiviti.
Ah Soon ukai semina landik ngaga duku chandung, tang mega nemu ngaga duku ilang enggau mayuh agi duku ke bukai.-TVS
