KUCHING, 18 Nov: PETROSNiaga diatu ngembuan tanggung pengawa nyadi pengidar tunggal gas petroleum basah (LPG) besubsidi di Sarawak.
Anak serikat ti dipenggi PETROS (51 peratus) enggau PETRONAS Dagangan Berhad (PDB) (49 peratus) diarika empat iku kaban kaunsil direktor.
Menteri Utiliti enggau Telekomunikasyen (MUT) Sarawak, Dato Sri Julaihi Narawi, madahka struktur Kaban Kaunsil Direktor PETROSNiaga ti ngaul dua iku pengari Direktor PETROS enggau dua iku pengari Direktor ari PDB.
Iya madahka pekara tu lebuh nyimpulka jurai ungkup opis menteri iya dalam Aum Kunsil Nengeri (DUN) Sarawak ke-19, sehari tu tadi.
“Opis menteri aku udah meri kerejasama ngagai mayuh bengkah ejensi baka Unit Pengelikun enggau Penerit Atur Sarawak (UKPS), KPDN, Opis Bombam Raban Bekuasa Lokal, PDRM, PGA, ATM, Katam sereta ejensi-ejensi ke bukai dikena nentuka pengawa matau ngagai semua aktiviti ke bekaul enggau tong LPG besubsidi,” ku iya.
Julaihi mega madahka proses nukar tong LPG kuning ngagai tong LPG Petros sechara ‘one-to-one’ enggau nadai chaj benung chakah diatur.
“Nyentuk bulan Oktober 2024, PETROSNiaga udah mujur nukar penyampau 690,000 unit tong LPG kuning ngagai tong LPG PETROS.
“Diatu bisi kira-kira 1.8 juta tong LPG besubsidi PETROS ba makit di selampur Sarawak,” tandu iya.
Chara tu ku iya madah ukai semina dikena negapka akses penguna ngagai LPG besubsidi tang dikena nentuka pengawa matau enggau nyadung tong tu chakah agi diatur ba selampur nengeri. – TVS
