DEBAK, 18 Nov: Opis Pengintu Pengelantang Komuniti (JKM) diperansang patut chakah agi ngatur Program Mini Outreach Santuni Komuniti (POSKOM) ba kandang menua pesisir.
Sapit Menteri Pemansang Indu, Nembiak Mit Enggau Pengelantang Komuniti Sarawak, Datuk Mohd Razi Sitam madahka, pengawa nya dikena nentuka semua penerang pasal servis ti disediaka JKM ulih dipejalaika sechara terus, kelimpah ngemuntangka komuniti ba kandang endur ke bekaul ti begunaka bantu pengelantang.
“Aku ngarap mega JKM ulih bejalaika mayuh agi POSKOM ba kandang menua pesisir, tebal agi ngambika penerang tu ulih datai ngagai komuniti kitai.
“Tu iya nya pengawa ngenataika servis secara betemu mua ti dipeda kami lebih efisyen sereta ngemudahka pemeli enggau raban ti begunaka servis dikena ngulihka penerang sechara terus,”ku iya.
Razi mansutka jaku nya rambau Pengerami Mini Program Outreach Santuni Komuniti (POSKOM) ti diatur JKM Bagi Menua Betong ba Rumah Panjai Inchok Embas Jalai Dit, di Sabar Lama ditu, kemari.
ADUN Saribas nya mega madahka, interaksyen entara kedua-dua raban sechara betemu mua enggau pegawai JKM enggau pemeli nengah pengawa ngatur POSKOM ba kandang menua pesisir mega ulih mutarka penanggul komunikasyen sereta salah penerang, seraya ngurangka runding negatif pemeli ngagai JKM.
Tandu iya, pemujur ngatur program baka nya ulih mantu raban Opis Pengintu Pengelantang Komuniti ngemaruka data bungkur servis ti nyadi pengukur ngagai pemujur program sereta empas servis sechara penuh.-TVS
