MASAI, 18 Nov: Menteri Penyaga Menua, Datuk Seri Mohamed Khaled Nordin madah pengawa ngeluarka kar baru pasal adan maritim nyadi sitak dikuasa menua ba Tasik China Selatan bepanggai ngagai ubah kar lama.
Ku iya, naka tu perintah sigi enda ngeluarka kar baru tang tetap bebendar ngetanka sitak enggau hak Malaysia baka ngelama tu.
“Tu kebendar empas lebuh Filipina ngeluarka kar sida, aku ngasaika pematut endur ngeluarka kar baru bepanggai ngagai enti bisi ubah ari kar lama.
“Kitai tetap enggau kar kitai. Iya ke bisi ubah nya enggi sida…sida ngubah kar sida udah masuk kandang menua kitai.
“Kitai sigi enda ngubah. Kandang endur sida ni ku sida. Kitai deka nepu tang kitai nadia ngubah kar kitai.
“Kar kitai tetap kar kitai. Kitai mengkang ngetanka kandang endur kitai enggau hak kitai baka ke udah disebu aku dalam parlimen chara kitai napi peminta ke betingkah tu.
“Kitai mesti nemu peminta tu besibil ukai semina nyerang ari siti menua ngagai menua kitai,” ku iya nengah sebengkah aum media pengudah Pengawa Nyerahka Zakat Wakalah BHP Petrol ba Masjid Muhajirin, Taman Rinting, Masai, Johor kemari.
Ku terang iya, dalam napi peminta ke besibil baka nya perintah deka nguna chara diplomatik.
Chara diplomatik ke diguna baka berandau pasal pekara nya lalu bantah mega digaga bepelasarka undang-undang antarabansa.
Siku Pakar Undang-Undang Maritim Antarabansa ari Universiti Sains Islam Malaysia (USIM), Prof Madya Dr Mohd Hazmi Mohd Rusli merambu ngasuh perintah ngeluarka kar baru.
Kebuah pia ku iya, kepenudi kar maritim Malaysia dikeluarka iya nya taun 1979, laban kenyau ari nya nyentuk diatu chukup mayuh ubah ba adan enggau peminta bekaul enggau maritim.
Minggu siti ke udah Presiden Marcos JR diripotka udah nyain dua undang-undang baru betuju negapka peminta menua nya ngagai Tasik China Selatan ti diperebut lalu sida udah netapka zon maritim enggau pejalai ba tasik.
Dua undang-undang baru nya bisi nuntut hak maritim sereta hak ngagai sitak ke diperebut ba Tasik China Selatan.
Berebak enggau nya, Sapit Menteri Luar Datuk Mohamad Alamin madahka akta baru nya netapka adan baru Filipina ke dipeda ngerampit kar Malaysia ke digaga taun 1979.-TVS
