KUCHING, 16 Nov: Sarawak Youth Startup (SYP) 2024 deka nyadi pantar nempa pedagang biak kelimpah nyadi siti ekosistem sukung sepanjai maya nyentuk nempa pedagang ke bisi daya besemekih napi ubah ekonomi sehari tu enggau dudi hari.
Sapit Menteri Nembiak, Lumba Enggau Pemansang Pedagang (Mysed) Sarawak, Datuk Dr. Ripin Lamat madah, SYP 2024 tu endang siti program timpuh panjai dikena negapka raban nembiak dalam bidang dagang.
“Kitai deka nempa enggau meransang raban nembiak masuk bidang dagang.
“Berebak enggau nya, kitai mega deka nempa mayuh agi penempa kereja ba raban nembiak laban kitai nemu senentang isu peluang gawa ke mimit jam diatu.
“Kitai deka raban tu nyadi penempa kereja enggau ukai semina nyadi pengiga kereja.
“Juluk kitai iya nya deka nentuka mayuh agi raban nembiak nyadi pedagang enggau pangka timpuh panjai iya.
“Kitai ngarap tu deka ngangkatka agi tikas sosioekonomi sereta penatai pemisi rayat,” ku iya.
Iya madah munyi nya rambau Aum Media Sarawak Youth Startup (SYP) 2024 ba hari kelima Aum Kedua Ungkup Penggal Ketiga Aum Kunsil Nengeri (DUN) Sarawak ditu, kemari.
Ke penerang, program SYP 2024 udah dikemendarka Premier Sarawak Tan Sri Abang Johari Tun Openg kena 1 Oktober yang tu tadi.
Urung 300 penyereta datai ari raban pedagang sereta pedagang ari selampur Sarawak deka datai nyereta program ti deka berengkah 7 nyentuk 14 Disember 2024 bepalan Ba Genturung Lumba Sukan Sarawak di Kuching.-TVS
