ABU DHABI, 7 Nov: Atur nyiri Sarawak Energy Berhad (SEB) nyadi patron global Kaunsil Kuasa Dunya (WEC) dipeda nyadi siti pengaku ngagai pemujur perintah Sarawak dalam ngatur puncha kuasa enggau efisyen sereta meruan.
Kelimpah ngembuan akses ngagai puncha kuasa ulih dikemaru, atur pengawa ti manah sereta senutuk enggau Juluk Pemansang Ti Meruan (SDG), Premier Sarawak Datuk Patinggi Tan Sri Abang Johari Tun Openg madahka, nya meri pengandal ngagai dunya ngaku pengawa ti dipejalaika Sarawak dalam bidang nya.
“Kitai endang betuah laban sida bisi pengandal ngagai kitai enggau nyiri SEB nyadi patron WEC.
“Tu beguna amat, reti nya dunya ngaku chara Sarawak dalam ngatur kuasa, ungkup pemesai guna timpuh panjai Sarawak, khas iya Malaysia, dikena ngesan tangkup dalam pengawa ngalih ngagai kuasa baru,” ku iya.
Iya bejaku munyi nya rambau randau eksklusif pengudah nyadi panel ke dikangau dalam aum ti mekuh ngagai Eksibisyen Enggau Aum Petroleum Antarabansa Abu Dhabi (ADIPEC) 2024 ba Palan Eksibisyen Nasional Abu Dhabi (ADNEC), kemari.
Ungkup rikod, SEB sechara rasmi udah dichiri nyadi patron WEC kena 29 March ke udah, ngujungka sida serikat keterubah ari rantau Asia Tenggara ngesan tanggungpengawa nya.
Nengah sempekat nya, SEB nyadi entara pengerandang kuasa hidro besai di Asia Tenggara, deka nyukung WEC dalam atur ngangkatka pengawa ngalihka kuasa ba serata dunya.
Ku iya, penyereta Sarawak dalam industri kuasa ulih dikemaru sechara agresif deka ngerembaika puncha ekonomi nengeri tu, seraya matak penatai pemeranak puku ke Sarawak laban pengandal sida enggau puncha bekal kuasa ti dikembuan wilayah tu.-TVS
