KUCHING: Mandal Presiden UMNO Datuk Seri Ismail Sabri Yaakub sehari tu ngangkat sumpah nyadi Menteri Besai Malaysia kesemilan ba mua Yang di-Pertuan Agong Al-Sultan Abdullah Ri’ayatuddin Al-Mustafa Billah Shah.
Adat nyiri enggau ngangkat sumpah mangku pengawa sereta sumpah nyimpan rahsia nyadi Menteri Besai diatur ba Balai Singgahsana Kecil, Istana Negara urung pukul 2.20 lemai tadi.
Agong nyemetak madah, penyiri Menteri Besai seriris enggau Pekara 40 (2) (a) sereta Pekara 43 (2) (a) Perlembagaan Persekutuan.
Penyiri Kaban Parlimen (MP) Bera nya dikena ngisi penuduk Menteri Besai sepengudah Tan Sri Muhyiddin Yassin nyurutka diri ari pengawa nya kena 16 Ogos suba ketegal nadai chukup sukung majoriti MP.
Tu nyadi berindik ari pemutus 15 iku MP UMNO ti enggai agi yukung perintah ti dipegai Muhyiddin ke mega Presiden Parti Pribumi Bersatu Malaysia.
Pengawa ngangkat sumpah nya dikemataka Sekretari Menua Besai Tan Sri Mohd Zuki Ali enggau Ketuai Akim Menua Besai Tun Tengku Maimun Tuan Mat.
