KUCHING: Raban Nembiak Parti Pesaka Bumiputera Bersatu (PBB) andal pengawa nyiri Datuk Seri Ismail Sabri Yaakob nyadi Menteri Besai ke-9 ulih mulaika baru pemanah pengawa ngatur menua.
Ku tuai Raban Nembiak PBB, Gerald Rentap Jabu, perintah besai ti deka ditumbuhka ila dikearapka ulih ngeratka agi kaul entara Perintah Besai enggau Perintah Menua Sarawak baruh pegai Kepala Menteri Datuk Patinggi Abang Johari Tun Openg.
Ku iya madah, nengah pengawa nyiri Ismail Sabri tu, Raban Nembiak PBB ngarapka Menteri Besai nyadiberi peluang enggau awak ngaga polisi enggau langgur dikena nagang pengekai igi penyakit COVID-19 sereta ngangkatka ekonomi menua.
“Kami endang nyukung pemutus Gabungan Parti Sarawak (GPS) ti diuluka Datuk Patinggi Abang Johari Tun Openg kena ngenegapka politik menua tu.”
Gerald mega madah GPS diatu mekuhka pengawa ngatur Sarawak enggau naka pemanah sereta ngiarka penemu ti bechiping enggau pangan diri ba menua tu ti tau ngujungka penyarut politik.
Ba awak ti sama, Perintah deka terus bebendar nagang pengekai igi penyakit COVID-19 di Sarawak ti ngayanka kes majak nambah ninting hari.
Kelimpah ari nya, PBB andal Perintah Nengeri deka seruran bejalaika Pelin Mulaika Pemanah Ekonomi Sarawak baka ti udah dipadahka Kepala Menteri bedau lama ti udah kena ngelantangka pengidup rayat.
TVS bisi ba Telegram, Facebook, Twitter, Instagram, TikTok enggau YouTube.
