MIRI, 3 Nov: Jematan ti besambungka menua Miri enggau Marudi deka tembu penuh sebedau pengerami hari Krismas taun tu, ku Datuk Patinggi Tan Sri Abang Johari Tun Openg.
Premier Sarawak nya madahka, jalai nya deka disambungka nengah Jematan Marudi ti udah tembu penuh.
“Enda lama agi, Miri deka besambung enggau Marudi sebedau Krismas, Jematan Marudi ulih dikena.
“Jematan nya udah tembu, reti nya kitai ulih nemuai ngagai kaban belayan kitai di Marudi enggau Baram, enda ibuh agi ngena feri lalu jematan tu nadai tol, semua pechuma.
“Nyadi kitai udah besambungka Miri enggau Marudi,” ku iya maya bejadika Taste Of Borneo Cultural Carnival (TOBCC) 3.0 ditu kemari.
Ku iya madah, Miri mega deka disambung terus ngagai Long Terawan sereta ditaga tembu dalam taun 2030.
” Perintah deka ngaga jalai alun ari Miri ngagai Long Terawan.
“Siti jalai ti panjai sebedau tu, ngarapka ulih tembu taun 2030 laban jalai nya panjai, lalu jalai nya deka nyambung luar kandang endur UNESCO Mulu terus ngagai Limbang.
“Nyadi, jalai ti baru digaga nengah menua Brunei Darussalam begulai enggau Brunei deka nyambung ngagai Miri baru.
“Reti nya tu jalai ti besai lalu kitai ulih negapka kaul enggau menua tu,” ku iya.
Berebak enggau nya, dua ari atur pengawa beserimbai enggau TOBCC mujur dirikodka dalam ‘Book Of Records Malaysia’, iya nya ‘Titian Perpaduan Sarawak’ enggau eksibisyen krafjari etnik ke pemadu besai. -TVS
