BETONG, 2 Nov: Sapit Menteri Besai Datuk Seri Dr Ahmad Zahid Hamidi udah mandangka pengeransing ngemansangka sitak menua pesisir di Sarawak, ku Datuk Amar Douglas Uggah Embas.
Sapit Premier Sarawak nya madah nengah penemuai Ahmad Zahid ke mega Menteri Pemansang Tumpuk Pendiau enggau Wilayah (KKDW) ngagai Sarawak, nyata mandangka pengeransing iya deka ngubah nasip rayat lebih agi rayat menua pesisir baka di Bukit Saban.
Ku iya, nengah projek baka ngemanah Rumah Panjai Enteri anak Lengkoi di Samu Ulu Paku, Spaoh mandangka pengeransing iya dalam ngubah kualiti pengidup rayat nengah PROSPEK.
“Antara inisiatif ke benung dipejalaika nengah PROSPEK (Projek Pemansang Ekonomi Penuh Tumpuk Pendiau) iya nya nupi manuk kampung ke diatu mujur mantu lebih 300 pintu ruang bilik, nanam lia ke manggai 10 kontena sebulan enggau krafjari Baju Dabung ke ngaul lebih 265 pelatih tukang jait enggau empat iku tebangkar,” ku iya.
Uggah mansutka jaku nya rambau Program Tuai Begulai enggau Rayat ke diatur ba Rumah Panjai Enteri anak Lengkoi di Samu Ulu Paku, Spaoh sehari tu tadi.
Nangkan ke nya iya madah, PROSPEK ukai semina mantu nyungkak penatai pemisi tang mega udah mujur numbuhka peluang gawa ke baru ngagai peranak lokal.-TVS
