SIBU, 2 Nov: Program Eksibisyen Karier enggau latih Sarawak (ScatFair) ti diatur di Sibu sehari tu tadi, nyadi pelasar ke beguna amat ungkup orang ke ngiga peluang gawa, siswa enggau pengajar ngulihka buah runding senentang mayuh macham penerang ke bekaul.
Menteri Pelajar, Inovasyen enggau Pemansang Bakat, Dato Sri Roland Sagah Wee Inn madahka, lebih 1,100 peluang gawa ti ngaul bemacham sektor bisi dibuka ngagai mensia mayuh.
Nengah awak nya, bala mayuh ulih terus betemu mua enggau pengaji sereta pengari institusyen pelajar tinggi.
Teks jaku Roland Sagah dibacha sapit iya, Datuk Dr Annuar Rapaee beserimbai enggau Program Bejadika ScatFair ti diatur ba Stadium Tetutup Sibu sehari tu tadi.
Iya nerangka, interaksyen nya manah ungkup siswa ti nyauka abis belajar laban muka runding sida ngaga pemutus senentang karier ti dipilih sida dudi hari.
“Achara baka ScatFair nyadi pelasar ti beguna amat nyukung pengawa tu, nyambung siku-siku orang ke bisi bakat enggau penerang ti dikena sida ngemujurka diri ba dalam bidang ke dipilih sida.
“Eksibisyen tu ukai semina mandangka peluang ke bisi, tang meri tumpu pasal komitmen kami deka nerenak sereta ngemansangka raban pengereja ti bepengelandik,” ku iya.
Beduduk enggau nya, iya madahka ngadaka raban pengereja ti bepengelandik dikena nyukung agenda pemansang sigi beguna amat, tebal agi Sarawak diatu udah mujur matak jalai nyadi sebuah nengeri bepenatai pemisi tinggi.
Tandu iya, nengah sukung ti rat ari institusyen pelajar, pengaji enggau insiatif perintah, juluk deka nempa komuniti bepelasarka inovasyen sereta pemeruan ulih dijapai.
Eksibisyen ScatFair mega nyadi bukti pengeransing raban iya ngidupka budaya belajar seumur idup, seraya nentuka tetiap rayat ngembuan akses ke sama ba dalam bidang pelajar, latih sereta peluang gawa.-TVS
