DEBAK, 27 Okt: Peminta nambahka Mesin Wang Automatik (ATM) di Debak deka dibai ngagai renggat pengatur Agrobank Berhad di Kuala Lumpur ngambika diperunding.
Tuai Bagi Pekara Wang enggau Pekara Bank Komuniti Agrobank Berhad, Abu Hassan Azhari Abu Bakar Shedek madah pekara nya deka diberi perati ungkup pemaik mensia mayuh ke diau ba pelilih nya.
“Kami deka mai iya ngagai renggat pengatur lalu kami deka menilai dikena nentuka tu deka meri penguntung ngagai komuniti lokal lebih agi komuniti di Debak.
“Sebedau tu kami endang kala udah nyendiaka mesin ATM ditu, “ku iya.
Abu Hassan madah munyi nya lebuh dirandau pemberita pengudah Program Literasi Wang 2024 Begulai Enggau Agrobank ti nungkatka rambai jaku “Celik Wang Dan Scammer Alert” diatur ba Sekula Sekondari (SMK) Saribas, kemari.
Ku iya mdah, raban Agrobank seruran ngaga pengawa ngemanah sereta matau dikena nentuka peranak di Debak, Spaoh enggau Betong ulih ngasaika servis ke pemadu manah.
Tandu iya, Agrobank mega seruran meratika guna komuniti lokal.
Ungkup rikod, Pelilih Mit Debak diatu bisi siti kiosk ATM ti udah beoperasyen kenyau bulan Ogos taun nyin kemari. -TVS
